Siku Extreme Arctic Challenge soqutigineqarluartoq

Ammassalimmi ulluni tallimani sakkortuumik imminut piumaffigaluni arpalluni unamminerit arfineq-aappassaat: Siku Extreme Arctic Challenge-imik taaneqartartoq, siornatigullu Arctic Team Challenge-imik taaneqartarsimasoq, qaammat ataaseq qaangiuppat aallartissaaq.

Arpatsitsinissamut peqataarusuttut amerlangaarmata inissat novembarimili nungunneqareersimasut, arpannermik ingerlatsisussaq Anders Stenbakken oqarpoq.

Pisarnertut filmiliortoqassaaq, tamatumunngalu Europami avatangiisit pillugit suliniaqatigiiffik suleqatigissallugu isumaqatigiissuteqarfigineqareersimavoq.

Taamaaliornikkut silaannaap allanngornerata nunatsinnut sunniutai sammineqassapput.

Silaannaap allanngornerata kinguneri nunatsinni innuttaasunut unamminartut periarfissallu sammineqassapput, soorluttaaq nukissiuuteqarneq, piniarneq, aalisarneq aamma takornariaqarnerup ineriartortinneqarnissaa sammineqassasut.

Filmiliassaq nunanut assigiinngitsunut 80-inut nassiunneqassaaq, Kalaallit Nunaata nunani tamalaani oqallinnermut peqataanera taamaalilluni ersersinniarneqassalluni.

Arnat marluk filmimi inuttarineqassapput, taakkulu tassaapput: Europami avatangiisit pillugit suliniaqatigiiffimmi professori pisortaanerlu Jacqueline McGlade kiisalu nunatta isumaanik saqqummiussisussaq Qivioq Kern Kreutzmann.