Sikorsuit aatsaat taama tunumi kujataanilu akornusersuitigilerput, angalaneq ajornarsiusavissimalluni. Kingullermik taama ingasatsigisumik 1900-kkoqarallarmat sikorsuaqarsimasoq, Narsarsuarmi sikunik alapernarsuisoq Jørgen Kjær Jensen ilisimatitsivoq.
-Sineriak assut sikorsuaqarpoq. Kingullermik taama sikorsuaqartigaaq 1999-imi. Imalu amerlatigaat allaat Tasiilamit Paamiut tikillugit isikkivik tamarmi sikorsuulluni. Nunap iluatigoortarfiit eqqarsaatigalugit Nunap isuanit tassa Nanortalimmit Arsummut sikorsuit akulloqquasassaanngingajapput eqimasorujussuugamik. Sikorsuit akulikingaaramik ilivitsukaarsuanngorsimapput imaannaq avissaartitassaanatik. Taamaaligaangallu angallatinut sikusiutaanngitsunut imartaq aqqutissaajunnaartarpoq. Avataani sikut saatsersut assut amma akulikitsut sikunik alapernaarsuisup ilisimatitsissutigaa.
Kujataani immakkut angalaniarneq ima ajornarsitigaaq, umiarsuarsuit allaat kinguaattoorujussuarsinnaasarlutik.
Assartuut Arina Arctica Royal Arctic Line-p umiarsuaataa assersuutissaqqippoq. Arina Arctica Qaqortumilu Narsameereerluni sikorsuarnit sapaatip-akunnerata naanerani anillannaveersimavoq, Narsamiit aallarami ualikkut marluniit unnuap-qeqqanut imaannarmut anillakaanniarsarisimalluni. Assartuutip ajutuunnginnissaa pillugu 3 knob-ersuinnarluni sikut akunnisiortariaqarsimavai.
Aperaarput ulluni tulliuttuni sinerissami akorsuit akullarnissaat ilimanarnersoq.
-Naamik, ilimananngikkallarpoq. Juuli tikivillugu sikorsuit minnerusumik annerusumilluunniit sinerissatsinniissangatippagut. Kujataani pissutsit allanngorallarnavianngillat, sikorsuit kangerluit sikuinut qerrussuussimapput imaaliallaannaq allanngorunnaratik. Satellitikkut assilisat malillugit Tunumi sikorsuit akunneqanngillat. Taakkulu sarfamit ingerlanneqarlutik nunap isua uiartuartussaammassuk peerukkallarnavianngillat, Jørgen Kjær Jensen naliliivoq.
