Sikorskyt ukiortaamit atorneqaqqilissapput

Innuttaasut ilaaffigeruttaqisaat qulimiguulik S-61 Qeqertarsuup Tunuani ukiortaamit atorneqaqqilissaaq.

Air Alpha aasaanerani qimagutissanngippat takornariat qulimiguulimmik angallannissaannut Air Greenland unammillerniarpoq.

Air Greenlandip Qeqertarsuup Tunuanut uteqqinnera pisortaata Flemming Knudsenip ima kinguneqassanerarpaa:

- Air Greenlandip uteqqinnerata kingurisaanik helikopteri S-61-i Ilulissat, Qeqertarsuup, Qasigiannguit, Aasiaat kiisalu Kangaatsiap akornganni timmisaleqqissaaq. Taava helikopteri minnerusoq suli atissaqartinngisarput ukiukkut nunaqarfinnik timmisartuussisalissaaq, Flemming Knudsen oqarpoq.

Ukiuunerani timmisartuussineq novembarip aallaqqaataaniit majip aallartinneranut pisassasoq kiffartuussinermut isumaqatigiissutaavoq.

Aasaanerani angallanneq immakkuinnaq isumagineqartassagami.

Air Greenlandip aasaanerani Qeqertarsuup Tunuaniit qimaguttarnissaanik tamanna kinguneqassanerluni ?

- Naamik Air Greenlandimi isumaqarpugut aasaanerani S-61-i suliassaqassasoq, Ilulissanimi takornariaqarnerup piorsarneqarnissaanut peqataarusoqaagut. Siornatigut Qeqertarsuup Tunuani S-61’qarsimavugut assut nuannarineqartumik, tamannalu aasaanerani misileraavigalugulu piorsaavigerusupparput, Air Greenlandip pisortaa Flem ming Knudsen oqarpoq.

Air Alpha Greenlandimi pisortaq Ole Dorph radioaviisimut oqarpoq aatsaat ukiaru oqaatigineqarsinnaalissasoq Air Alpha aasaqqippat, takornariat timmisartuunneqarnissaannut unammillerluni Ilulissaniiginnassanersoq.

Annaassiniarnermi atortakkat kivitsissutit Air Greenlandip pigereeramigit annaassiniarnernut sullissisinnaalluarlutik Air Greenlandip erseqqissaatigaa.