Sikaratsinik tunisat affaannanngorsimapput

Naatsorsueqqissaartarfiup naatsorsugaani tamanna takuneqarsinnaavoq. Eqqussorneqartartut inummut ataatsimut agguaqatigiissitsinikkut affaannanngorsimapput. Sikaratsit 126 millionit sinnerlugit 1994-imi tunineqarsimapput, 2012-imilu 68 millionit tunineqarsimallutik.

Tamatumali nuannaarutiginissaanut siusippallaarpoq. Kisitsisimmi pujortartartut ikiliartornerinik takutitsinersut nalorninartoqarpallaarpoq, Susanne Stilling innuttaasut peqqissuunissaannik suliniummi Inuunerittami pitsaaliuinermik siunnersortitut atorfeqartoq taama oqarpoq.

- Peqqutaasinnaasut marluupput. Innuttaasut pujortarpallaarunnaarsimasinnaapput, imaluunniit akitsuusigaanngitsunik tupasinerusalersimasinnaapput, taakkumi naatsorsuinermi ilaatinneqanngillat, pitsaaliuinermik siunnersorti oqarpoq.

Pisortat illuutaanni pujortarneq 2004-mi inerteqqutaalerpoq. Susanne Stilling isumaqarpoq sikaratsit eqqussorneqartut ikileriarujussuarnerannut tamanna peqqutaaqataasinnaasoq.

- Suliffeqarfinni pisortallu illuutaanni pujortartarnerup inerteqqutaalerneratigut amerlasuut silamukaqqaarlutik pujortartalerput. Maanilu nilleqimmat immaqa pujortartartut ilaat pujortanngitsuuinnartarput, pitsaaliuinermik siunnersorti oqarpoq.

Innuttaasut peqqissuunissaannik suliniut, Inuuneritta, pujortartarnerup annikillisinnissaanut periusissaliorsimavoq. Pujortartartullu siunissami suli ikinnerulersinnissaat anguniagaavoq. Susanne Stillingillu oqaatigaa pingaarnertut suliniuteqarfigineqartut pingasuusut: naartusut, inuusuttut innuttaasullu pujortartartut nalinginnaasumik ikinnerulersinnissaat. Kingullertullu taaneqartoq pingaaruteqarpoq, tassalu meeqqat inuusuttullu pujortartarneq ulluinnarni nalinginnaasutut isigalugu peroriartunnginngissaat.