Sikaratsikut pillugit

Juliane Henningsen sapaatit akunnerata siuliani § 37 naapertorlugu apeqquteqarpoq, taakkulu nunatsinni pujortartartut sikaratsikunik sumut tamaanga eqqaasarnerannut tunngassuteqarput. Apeqqutillu taakku naalakkersuisup Mette Lynge maanna akissuteqarfigai.

Allattoq Peter Troelsen, Simon Uldum

septembarip 27-at 2013 05:56

Sikaratsikunik pinngortitamut eqqaasarnerup inerteqqutaanera, tamannalu ukiuni kingullerni 20-ni atuussimavoq naqissuserneqarpoq. Taamaakkaluartoq pinngortitami illoqarfimmilu sikaratsikut takussaaqaat.

Kommunit aamma eqqaavinnik siparninik eqqaavinnillu containerinik pisortaqarfiit eqqaanni inissiinissaminnut pisussaaffeqarput, Mette Lyngelu naapertorlugu sikatsikoorfissanik matoqqasunik inissiisarnissamik aalajangersakkat ilaneqarnissaannik Naalakkersuisut maanna isumaliuteqarput.

Juliane Henningsenip aamma paaserusuppaa pinngortitami eqqaasarneq akiorniarlugu Naalakkersuisut paasititsiniaanissamik pilersaaruteqarnersut. Naalakkersuisup Mette Lyngep taamaaliortoqarnissaa uppernarsarpaa, taannalu oqaluttuarpoq paasititsiniaaneq 2014-imi upernaakkut aallartissasoq. Tassanilu sikaratsikut eqqagassallu allat eqqaavinnut iginneqartarnissaat pinngortitamullu igiinnarneqartannginnissaat paasissutissiissutigineqarumaarpoq.

Sikaratsikut pillugit

Aamma atuaruk