SIK uparuartuiinnarani suleqataasariaqarpoq
SIK suliffissaaleqineq pillugu isumakuluutaa Sulisitsisut Peqatigiiffiata GA-p isumaqataaffigaa, SIK-lli suliaqarfimmut ilivitsumut appisaluussinera ilisarisinnaannginnerarlugu. Allattoqarfimmi pisortap Karsten Klausenip suliaqarfik nersualaarpaa, tassaammammi nunatsinni suliaqarfik amerlanerpaanik ilinniartoqarfiusoq.
-SIK-p akunnittarfiutillit neriniartarfiutillillu allamiuinnarnik sulisoqarneranik oqaaseqarnera ilumuunngilluinnarpoq. Suliaqarfimmi tassani sulineq ilungersunartupilussuuvoq, ajoraluartumillu inuusuttorpassuit tamanna pissutigalugu inuussutissarsiuummi tassani sulilernissartik qunugisarpaat. Suliaqarfimmi tassani sulisup ataatsip ukiumut suliarisinnaasaasa naatsorsornera 1,6-iugaangat ataatsimik ilinniartoqartarpoq, tamannalu ajunngilluinnarpoq, Karsten Klausen knr.gl-imut oqarpoq.
GA-p ilinniartoqarneq pillugu misissuisimanerata kisitsisitai naapertorlugit niuernerup iluani sulisup ataatsip ukiumut suliarisinnaasaasa naatsorsornera 2,6-iungaangat ataatsimik ilinniartoqartarpoq, assartuinermilu kiffartuussinermilu kisitsit 2,0-iuvoq sanaartornerup iluani sulisartunut tunngatillugu 2,5-iulluni.
Akunnittarfinni neriniartarfinnilu kalaallinik sulisoqarniarnerup ajornartorsiutaaneranut peqqutaasinnaasut ilagaat piffissap suliffiusup akunnattuunera, aamma takkuttuarnissamik kiffartuussinikkullu annertuunik piumasaqaateqarfiuvoq. Taamaammat inuussutissarsiuummi tassani ilaatigut Thailandimeersunik Filippinerineersunillu sulisussarsisoqartariaqarsimavoq.
-Suliassaqarfimmik ataatsimik ”sulisunik nunanit allaneersunik atornerluineraalluni” saassussiunnaarluni aammalu ”sakkortunik iliuuseqarluni” suliffissaaleqinermik naalakkersuinikkut iliuuseqaqqusiunnaarluni, inuiaqatigiinni nutaaliaasuni akunnittarfinni neriniartarfinnilu sulinermi piumasaqaatinik naammassinnissinnaasunik sulisussaqalernissaa anguniarlugu oqartussaasut naleqquttut suleqatigalugit tamanna anguniaqqullugu SIK kaammattussavarput, Karsten Klausen oqarpoq.
