SIK suliumajunnaarnissamik ilimasaarivoq

SIK maanna Sulisitsisut Peqatigiiffiannut pingaarnerusumik isumaqatigiissuteqarniarpoq. SIK-mi ilaasortat suliffeqarfinni Sulisitsisut Peqatigiiffianni ilaasortaasuni sulisuusut suliumajunnaarnissaannik SIK ualimut ilimasaarivoq. Taamaalilluni suliumajunnaarneq ataasinngornermi marsip 19-anni aallartinneqarsinnaavoq.

Suliumajunnaarnissamut ilimasaarummut tunngaviuvoq, Sulisitsisut Peqatigiiffiata Qaammarsaanermut Ilinniartitaanermullu Aningaasaaateqarfimmut aamma Sulinngiffeqarnermut Aningaasaateqarfimmut akiliisarumannginnera. Tamanna pissutigalugu SIK ukiuni marlungajanni Sulisitsisut Peqatigiiffiannik isumaqatigiissuteqanngilaq.

Isumaqatigiissitsiniarnikkut eqqartuussiviup Sulisitsisut Peqatigiiffiat ilumoornerarpaa, SIK-lu isumaqatigiissummik pingaarnermik unioqqutitsinerarlugu, isumaqatigiissullu pingaarneq SIK-p nutaamik taarserusuppaa.

- Isumaqarpugut pingaarnertut isumaqatigiissut illuatungeriinnut iluaqutaasariaqartoq, kisianni SIK-p Sulisitsisullu Peqatigiiffiata pingaarnertut isumaqatigiissutaat illuatungitsinnut taamaallaat iluaqutaasimavoq, SIK-p siulittaasua Jess G. Berthelsen oqarpoq.

- Taamaattumik SIK allamik periarfissaqanngilaq taamaallaat suliumajunnaarnissamik ilimasaarilluni. Periarfissaq alla tassaavoq isumaqatigiinniarnissaq, kisianni sulisitsisut aningaasaateqarfinnut akiliiumanngippata isumaqatigiinniarnissamut tunngavissaqanngilagut, Jess G. Berthelsen oqarpoq.

Sulisitsisut Peqatigiiffiata pisortaata Henrik Lethip ukiut marlungajaat isumaqatigiinniartoqanngereersorlu suliumajunnaarnissamik ilimasaarisoqarnera tupigusuutigaa.