SIK: Sulitillutik ajutoorsimasut maannamut 205-iupput

- Taamaammat SIK 2007-imiilli ilaasortaminut erseqqissaajuarpoq, sullivimmi nalilersuisarnerit, ukiortaamiit tamakkiisumik atuutilertussat, aallunneqartariaqartut.

SIK-p allattaanera, Beathe Henriksen, oqarpoq.

Taassuma erseqqissarpaa, sullivinni avatangiisit pitsaasuunissaannut sulisartut namminneq aamma akisussaaffeqartut.

- Sulisitsisoq kisiat isumalluutiginagu, aamma sulisartut namminneq peqataallutik suliffimmik iluani isumannaallisaanermut tunngasunik pitsanngorsaatissanik saqqummiussiuartussaapput, taakkulu aaqqinnissaat sulisitsisumut apuussortussaavaat.

>Ilaasortarpassuaqarpusi, qanoq maluginiarpisigit ilaasortasi tassunga APV-p, sullivinnik nalilersuinerup atulerneranut peqataanissaminnut soqutiginnitsiginerat?<

- Ukua suliffitsialanngortitsisalernerup kingunerisaanik ilaasortat aammalu suliffeqarfinniittut sulisartut suliffitsialanngornissamut peqataasarsimasut nuannaarutigisartorujussuuaat sullivimminni imminnut suleqatigiittut ataqatigiinnerulerneq, isumannaallisaanermut tunngatillugu atortussanik atortulersorneqarnerit il.il. pissutigalugit sulisut suliffeqarfimminnut ornigunnissaminnut kajumissuseqarnerulersartut. Taava aamma suliffik nalilersorneqartalerpat; nalunngilarpullu nunatsinni suliffeqarfeerarpassuaqartoq, immaqalu oqarsinnaagunarpugut ilaatigut suliffigineqarnissaminnut naleqqutinngitsunut allaat. Taakkua naleqquttunngorsarneqassappata, taanna sullivinnik naliliisarnermi inatsit eqqumaffigissallugu pingaarutilerujussuuvoq aamma sulisartuninngaanniit.

>Qanoq ilaasortasi kaammattorsinnaavisigit?<

- Kaammattorsinnaavagut tamakku sullivimmi iluanni isumannaallisaanerit, taavalu aamma suliffik suliffigineqarnissaminut naleqquttuunersoq, tamannalu suleqatigiillutik iluminni oqaloqatigiissutigalugu nalilersortassagaat, nalilersuinerminnilu aamma sulisitsisoq peqatigisassagaat. Taakkulu sullivimmik pitsanngorsaatissat taamaalillutik ingerlassinnaavaat, taama oqarpoq SIK-mi allattuuneq, Beathe Henriksen.