SIK: Siumukkut naalakkersuisunngorneranni suliffissaaleqisut ikilinissaat neriuutigaarput
Siumup, Atassutip Partii Inuillu suleqatigiinnissamik isumaqatigiinnerat, SIK-p siulittaasuata, Jess G. Berthelsenip pitsaasuunersoq pitsaanngitsuunersorluunniit oqaaseqarfigisinnaannginnerarpaa, imalu oqarluni.
- Neriuuteqarfigaakka aamma eqqarsaatigalugit suliffissaaleqinerup Nunatsinni annertusisimanera qineqqusaarutaammata tamassuma annikillisarneqarnissaa pillugu. Taamaattumik neriuuteqarfigaara naalakkersuisunik nutaanik pilersitsisoqarneratigut suliffissaaleqisut appariartsinneqassasut.
Sulisartut Kattuffiata siulittaasua, Jess G. Berthelsen taama oqarpoq.
Qineqqusaarnerup nalaani Siumumit aammalumi partiinit allanit neriorsuutigineqartoq, tassalu Nunatsinni suliffissaaleqisut ikiliartortsinnissaannik partiinit suliniuteqarnissaat, Jess G. Berthelsenip neriuutigaa.
- Neriuuteqarfigaakka pissutigalugu qineqqusaarnermi pingaarnertut ilaatikkamikku, sinerissami suliffissaaleqinerup annertusiartorsimanera aamma sinerissami sanaartornermut tunngatillugu taakku annikilliartorsimanerat, tassami taakku imminnut attuumassuteqarmata. Suliffissaaleqineq ukiuni kingullerni annertusiartorsimavoq, tamannalu ilaasortatsinnut annertuumik sunniuteqaersimalluni.
Jess G. Beerthelsenip ilanngullugu oqaatigaa Nunatsinni sanaartornerup annertusarneqarnissaa neriuutigalugu, taanna ima nangilluni oqarpoq.
- Suliffissaarukkallarnerup nalaani ikiorsiisarneq maanaannaq allanngortinneqarsimavoq, ajornarnerulerluni. Tassa imaappoq, suliffissaaleqinerup annertusinerata saniatigut, suliffissaarukkallarnerup nalaani ikiorsiissutit aamma ajornarnerulersimavoq. Tamassumalu kingunerisaanik inunnik isumaginninnermi ikiorserneqarsinnaaneq ajornarnerulersimasoq misigaluta. Taamaattumik neriuppunga tamakku aaqqiivigineqarumaartut.
Jess G. Berthelsenip nuannaarutiginerpaasaasa ilagaat, siliniutit angisoorsuit inatsisaasa allanngortinneqarnissaa, Siumukkunnit qineqqusaarnerup nalaani neriorsuutigineqarsimammat.
- Qineqqusaarnerminni oqariartuutaat, maanui Nunatsinni kattuffiit kisimik suliniutinut angisuunut tunngatillugu isumaqatigiinniarsinnaatitaanisaata aaqiivigineqarnissaaq neriuutigaara.
SIK-p siulittaasua, Jes G. Berthelsen taama oqarpoq. Siliniutit angisoorsuit inatsisaanni paragraf 10, SIK-p siulittaasuata uani eqqartorpaa, tassami inatsimmi allassimammat, suliffeqarfissuit sulisui nunat allamiut sulilerneranni nunat allamiut isumaqatigiissutaat malillugit Nunatsinni taakku atorfinitsinneqartassamata.
