SIK: SIK-mi ilaasortat akikitsunik illusisinnaatitaasariaqarput
Naalakkersuisuusimasut atorfilittallu pisortat illuutaannik akikinaarlugu pisisarsimanerat pillugu oqallinnermi SIK-p siulittaasua Jess G. Berthelsen taama oqarpoq:
- Isumaqarpunga arlaatigut nutaamik periarfissiisoqartariaqartoq teknisk værdi aallaavigalugu pisinissamut, imaluunniit allatigut aningaasat tungaatigut oqilisaassisoqartariaqartoq, ilaasortagut aamma periarfissaqarniassammata nammineq illumik pisinissaminnut, Jess G. Berthelsen oqarpoq, nangipporlu:
- Qujanartumik paasivara ilaasortagut arlallit periarfissaq taanna atorlugu taama aamma pisisimasut, nuannaarutigaaralu. Taamaattumik isumaqarpunga taamatut periarfissiisimaneq uteqqillugu aaqqiivigineqartariaqartoq, ilaasortagutallat aamma ukiorpassuarni najugaqarisimasaminnik teknisk værdi atorlugu pisisinnaaniassammata, SIK-p siulittaasua Jess G. Berthelsen oqarpoq. SIK-mi ilaasortat arlallit inatsit taamanikkut atuutsinneqaraluartoq aqqutigalugu inigisartik akikitsumik pisiarisimagaat, Jess G. Berthelsenip erseqqissaatigaa.