SIK: Politikerit sulisartunik sumiginnaapput
SIK-p siulittaasua oqarpoq akileraartarnernut tunngasunik oqartussat iliuuseqarpiarsimannginnerarpai:
- Nunatta oqaluttuassartaani nutaanerusumi ajoraluartumik misigisimavunga pissaqarnerit pissakinnerillu akornanni pissutsit ullumikkut aatsaat taama assigiinngitsigilersimasut. Tassunga atatillugu tupiginerpaavara inatsisiliortuvut akisussaasut ineriartorneq nuanniitsoq taanna, atuagarissaarnissatsinik ulorianartorsiortitsisoq sulinermillu inuussutissarsiutillit pingaarutilitsigut periarfissaannik arlalinnik arsaarinnittoq, akiorniarlugu pimoorussisumik iliuuseqarsimanngimmata.
Akileraartarnermut atugarissaarnermullu isumalioqatigiissitap innersuussutai innersuussutigalugit, akileraariaaseq inuinnaat naalakkersueqataaneranni naapertuilluartutut tunngavigineqarsinnaasoq inuiaqatigiinnullu tamanut iluaqutaasussaq SIK-p siulittaasuata ujartorpaa.
- Apeqqummi pingaarutilimmi tassani assortorneqarsinnaagunanngilaq, sulinitsigut qanoq inuussutissaqarsinnaanerput inuit ataasiakkaat iluatsitsinerannut tunngaviusarmat, taamaalillutalu isornaatsumik inuusinnaalluta, taamalu aamma ilaquttavut pilersorsinnaallugit meeqqattalu ajunngitsumik ilinniagaqarnissaat isumagisinnaallugit, Jess G. Berthelsen oqarpoq.
Taavalu Naalakkersuisut decembarimi akissarsisitsinermi, maannamut pissusiusutut juulli sioqqullugu akissarsisitsisarneq atorunnaarlugu, decembarip 30-anni aatsaat akissarsisitsisalerniarnerat sakkortuumik uparuarneqarpoq.
- Tassa aamma politikereqalernerpugut juullip eqqissinartuanik aseruiniartunik, erseqqilluinnartumillu aalajangiisunik maani inuiaqatigiinni assigiinngisitsineqartoq pigissaartunik amigaateqanngitsunik amerlanerussuteqarluartunillu pissakitsunik? - Naanguna Naalakkersuisut meeqqat ilaqutariillu eqqarsaatigalugit oqaaseqartuartartut? Illuatungaatigulli uummateqanngilluinnarlutik taama aalajangiisut? SIK-p siulittaasua maajip aallaqqaataanni ualimut oqalugiaammini ilaatigut taama oqarpoq.
