VIDEO SIK: Pisortanit ikiorsiissutit allanngortinneqarlik
Ilulissani Halibut Greenland sulisussaaleqivoq sulisartut ilaasa pisortanit ikiorsiissutinik pisartagaqarnissaq qinertarmassuk:
- Tassami allaat ilaannikkut imaattarpoq, akilersinnaanerusarluni sulinnginneq killilimmiluunniit sulineq, Niels Thomsen Halibut Greenlandimi pisortaq KNR-imut oqarpoq.
Pisortanillu ikiorserneqartarneq iluaqutaanngimmat SIK-p siulittaasuata taamaatitsinneqartariaqarsoraa.
- Taamaatsinneqartariaqarpoq ataatsilluunniit iluaqutiginngilaa, Jess G. Berthelsen SIK-mi siulittaasoq KNR-imut oqarpoq.
Ikiorsiissutit taamaatsillugit sulisartut inuussutissaqanngillat
Pisortanit ikiorsiissutit utertinneqartussaapput, pineqartoq sulilersimappat, amerlanertigullu sulilersoq ilinniagaqarsimasuusanngilaq, agguaqatigiisillugulu akunnermut akileraannginnermi 90 koruuninik akunnermusiaqartarluni.
Taakkunanngalu pisortanit ikiorsiissutinut utertitassanut akissarsiat 33 procentia, tassa akissarsiat pingajorarterutaat, pisortanut utertinneqassapput.
Tassa piisortanit ikiorserneqarsimasup utertitassani akilerunigit, 28 koruuninik akunnermusiaqassaaq.
- Taava qanoq ililluni inuussagami, Jess G. Berthelsen aperaaq.
Taamaattumillu pisortanit ikiorsiissutit pillugit peqqussut piaartumik allanngortillaqquneqarpoq.
Parti Naleraq Atassullu pisortaninngaanniit ikiorsissutit utertinneqartarnerat misissugassaqqittoq isumaqarput.