SIK-p siulittaasuata sapaatip akunnerani suliffik sivikinnerusoq tikilluaqquaa: Akissarsiat naapeqatigiissutigineqassanngillat

​Naalakkersuisut nunatsinni piffissap suliffiusartup sivikillisinneqarnissaanut isumaqatigiissusiorniassagunik Sulinermik Inuussutissarsiuteqartut Kattuffiata (SIK) siulittaasua, Jess G. Berthelsen piareersimavoq.

- Tamanna tikilluaqqulluinnarpara. Nunanimi avannarlerni sapaatip akunneranut akunnerni 40-ni suliffiusartuni kisiartanngungajalerpugut, taanna oqarpoq.

Jess G. Berthelsenili ataatsimik piumasaqaateqarpoq.

- Naapeqatigiinniartoqarfiussanngilaq. Ilaasortatta akissiaat apparsinnaanngillat. Akunnerit suliffiusut 37-nut apparneqassappata akissarsiat qaffanneqassapput, ilaasortatta akissarsiaat taamaalillutik appartinneqassanatik.

Nunatsinni qanoq amerlatigisut sapaatip akunneranut akunnerni 40-ni sulisarpat?

- 2020-mi nunatsinni akissarsialinnit tamanit 72 procentit sapaatip akunneranut akunnerni 40-ni sulisarnissaannik isumaqatigiissuteqarfiupput.
 
- Akissarsiallit 20 procentii sapaatip akunneranut akunnernik nikerartunik sulisarnissaannut isumaqatigiissuteqarfiupput, 7 procentiilu sapaatip akunneranut akunnerni suliffiusussanik isumaqatigiissuteqarfiunatik.
 
Nunatsinnili sapaatip akunneranut suliusortoq ilumoortumik europami nunanut aalajangersimasunut sanilliullugu allaaneruvoq.
 
- 2019-imi nunatsinni akissarsiallit amerlanerpaartaat sapaatip akunneranut agguaqatigiissillugu akunnerit 38,1-t sulisarput.
 
- Danmarkimi akunnernit isumaqatigiissutigineqartunit 37-nit akunnerit 33,2-t suliffiupput.
 
EU-mi (Nunani 28-ni) agguaqatigiissillugu: akunnerit 36,3-upput

Paasissutissarsiffik: "Den Grønlandske Arbejdskraftsundersøgelse," Aalborg Universitet 2020,
Savalimmiuni naalakkersuisut sapaatip akunneranut akunnerni 40-ni sulisarnerup 37-nut apparneqartinnissaanut isumaqatigiissuteqarsimanerata kingorna maani oqaluuserineqalerpoq.

Naalakkersuisoq ammaffiginnittoq
Suliffeqarnermut naalakkersuisup, Jess Svanep sapaatip akunneranut sulisarnermut sivikillisinneqarnissaa ajoriffissaqartinnagu KNR-imut oqaatiginikuuaa.

- Inatsisartut misissuinissatsinnik taamalu ittumik siunnersuusiornissatsinnik oqarpata soorunami taamaaliussaagut, Jess Svane KNR-imut oqarpoq.

Node link
Title
Naalakkersuisoq er åben for kortere arbejdsuge, men har ikke et bud på prisen

Jess Svanep tamatuma saniatigut sulinerup sivisussusaanik sivikilliinissaq innuttaasut akissarsiaannut eqquissanngitsoq erseqqissaatigaa.

- Taamaattoqassanngilaq, suliffeqarfiit aaqqissuunneqarneranni innuttaasut isertitaminnik annaasaqarnissaat Naalakkersuisut iliuusissarinngilaat, taanna oqarpoq.

Tamanna SIK-p siulittaasuanut, Jess G. Berthelsenimut akissarsiat allanngortinneqannginnissaannik isumaqatigiinniarnissamut pinngitsoornagu piumasaqaateqarniartumut nutaarsiassatsialaavoq.

SIK-p suliffiup piffissaata annikillineqarnissaanut suliaq pingaaruteqartippaa, taamaammat naalakkersuisup Jess Svanep sapaatip akunneranut suliffiup sivikillineqarnissaanut ajorinninnginnera Jess G. Berthelsenip nuannaarutigaa.

Anguniagaq piviusorsiortoq
Jess G. Berthelsenillu nunatsinni sapaatip akunneranut suliffiup akunnernut 37-nut sivikillineqarnissaa aamma pissusissamisoortuusoraa. Taanna aalajangiisussaagaluaruni aningaasassaraluarunilu sapaatip akunneranut sulisarneq akunnernut 35-nut appassagaluarpaa.

- Danmarkimi sumiiffippassuarni sapaatip akunneranut ulluni sisamaannarni sulisoqartarpoq, tamannalu iluatsitsilluarfiuvoq, taanna oqarpoq.

Sapaatip akunneranut akunnerit 37-t sulisarnermi nunatta karsianut aningaasartuutit:
 
Aningaasaqarnermut Aatsitassanullu Naalakkersuisoqarfiup kisitsisaatai sapaatip akunneranut akunnerni 37-ni sulisoqartarnissaa nunatta karsianut aningaasartuutissaanik takutitsipput. Naatsorsuinerilli pisortat suliffeqarfiini sulisunut tunngatillugu TAAMAALLAAT naatsorsugaapput.
 
Kisitsisit missingiutaapput.
 
- Sapaatip akunneranut akunnerni 35-ni sulisoqartarnera ukiumut 462 millionit koruunit missaat
 
- Sapaatip akunneranut akunnerit 32-t ukiumut 740 millionit koruunit missaanniissaaq
 
Tamatuma saniatigut sulisut inissaannut amerlanerusunut, allaffimmi inissanut aningaasartuutinullu allanut kiisalu sulisunik akunnerni suliffiugunnaartuni sulisussanik amerlanerusunik atorfinitsitsinissamut aningaasartuutit ilanngunneqassapput.
 
Paasissutissarsiffik: Paragraf 37-mut apeqqummut Anna Wangenheimip aningaasaqarnermut aatsatassanullu naalakkersuisumut Vittus Qujaukitsumut apeqquteqataa nr. 2020-50.

Nunatsinni susassaqarfinni arlalinni sulisussat ullumikkut amigaataapput, taamaammat sapaatip akunneranut akunnerit 35-nngortinneqarnissaa piviusorsiortumik anguniagassaava?

- Aap, taama isumaqarpunga. Isumaginniffinni aalajangersimasuni sumiiffinnilu sulisussanik amigaateqarpugut. Nunatsinnilu sumiiffiit ilaanni suliffissaaleqisoqangaatsiartoq puigussanngilarput, tamannalu ullumikkornit atorluarnerussavarput.

Node link
Title
Flere er pirret ved tanken om en 37-timers arbejdsuge: Vi taber vores børn

Suua?

- Assersuutigalugu Tunumi suliffissaaleqisut 20 procentit missaanniipput. Nunatta kujataani aamma suliffissaaleqisorpassuupput. Tassani isumaqarpunga isumalluutit ullumikkornit atorluarnerussagigut.

Isumalluutit qanoq atorluarneqarnerusinnaappat?

- Nunatta avataani sulisussarsiornani nunatta kujataanit tunumiillu suliffissaaleqisoqarfiusunit sulisussarsiortoqarsinnaavoq.

Savalimmiuni naalakkersuisoqatigiit nutaat tassa partiit Javnaðarflokkurinip, Tjóðveldip aamma Framsóknip Savalimmiuni sapaatip akunneranut akunnerit suliffiusartut 40-nit 37-nut sivikillineqarnissaat naalakkersuisoqatigiinnissaminnut isumaqatigiissutigaat.

Savalimmiuni naalakkersuisut isumaqatigiissutertik eqquutsikkunikku nunarput nunani avannarlerni kisiartaalluni sapaatip akunneranut akunnerni 40-ni suliffiusartunngussaaq.