SIK-p siulittaasua: Immikkoortortaqarfiit namminersulivinnissamik siunniusseqataapput
Naammaginninnginneranut patsisaavoq, immikkoortortaqarfinni siulittaasut pingasut sapaatip-akunnerata naanerani Jess G. Berthelsenip 2012-imi nunatta namminersulivinnissaanik oqaasii isornartorsiormatigik. Immikkoortortaqarfinni siulittaasut pingasut isumaqaramik tamanna siusippallaartoq nunarpullu aningaasarsiornikkut piareersimannginnerarlugu.
- Immikkoortortaqarfinni siulittaasut pingasut taamatut oqaaseqarnerat ajuusaarutigaara, tassami 2012 tassaammat nakkutilliisoqarfiup 2002-mili aalajangiinera. Aamma immikkoortortaqarfiit taakku pineqartut nakkutilliisoqarfimmi aalajangersakkat ilaasortanut paasisitsiniutigisarsimanngippatigik ajuusaarpunga, Jess G. Berthelsen tusagassiuutinut nalunaarummini ilaatigut taama allappoq.
SIK-p siulittaasuata maluginiarpaa, immikkoortortaqarfiit 2012-imik siusiginnillutik nalunaartut tassaammata 2002-mi nakkutilliisoqarfimmi aalajangeeqataasut.