SIK-p Norgemi kattuffeqatini misiginneqatigaa
Jess G. Berthelsen misiginneqatiginnissummi ilaatigut ima allappoq:
- Kalaallit sulinermik inuussutissarsiuteqartut kattuffiat, SIK, tassalu ilaasortat sinnerlugit Norgemi alianarluinnartumik pisoqarneranut misiginneqatiginninnerput takutikkusuppara, SIK-p siulittaasua taama aallarniivoq. Naggasiumminilu ima allappoq:
- Piffissami artornartumi nunat killeqarfii akimorlugit kattuffittut ikorfartoqatigiinnissap qanoq pingaaruteqarluinnassusia paasilluinnarpara. Ukiuni makkunani, nunarsuarmi ineriartorneq taama sukkatigitillugu inuiaqatigiinni naligiinnginneq akiorniarlugu inuillu ataasiakkaat inuiaqatigiinni demokratiskiusumi pisinnaatitaaffii illersorniarlugit kattuffiit ikorfartoqatigiittariaqarput. Piffissami alianartumi Norgemi innuttaasut tamarmik ilissilu eqqarsaatitsinniippusi, Jess G. Berthelsen allagamini naggasiivoq.