SIK-p mamakujuit kaffillu ilaasortaminnut akikinnerulernissaat kissaatigaa
- Sunaluunniit siunnersuutigineqartoq ilaasortatta ulluinnarni inuuniarnerannut aammalu aningaasarsiat pisissutigineqarsinnaanerannut pitanngoriaatitsisoq uanga soorunami tapersersorpara, Jess G. Berthelsen taama oqarpoq.
Demokraatit akitsuutit pillugit Inatsisartut ukiakkut ataatsimiinneranni siunnersuutaasa sisamat akuersissutigineqarnissaat Jess G. Berthelsen neriuppoq.
Siunnersuutit neqinut, kaffinut tiinullu akitsuutit peerneqarnissaannut tunngapput. Aamma sukkunut, lakridsinut sukkulaatinullu akitsuutit apparnissaat Demokraatit kissaatigaat. Partii akitsuutinik taakkuninnga 2019-imi atuutilersitseqataavoq.
AAMMA ATUARUK Naalakkersuisut vil tygge på forslag om at fjerne afgift på kød, kaffe og sukker
Sukkut 1 kiilu koruuninik sisamanik 31 oorinillu taamani akitsorput, sukkulaatit mamakujuttullu kiilumut koruuninik tallimanik akitsortut.
Demokraatilli atuutilersitseqataanertik peqqissimissutigigamikku akitsuutit maanna appartinniarpaat.
Tamannalu Jess G. Berthelsenip nuannaarutigaa.
- Ilaasortatta aningaasarsiaat pisissutigineqarsinnaasut maannakkut eqqarsaatigaakka, taakkuummatami ilaatigut ukuninnga taakkartorneqartunik ulluinnarni annertuumik atuisut, taamaattumik akitsuutit ukua millineqassappata imaluunniit peerneqassappata, uagut soorunami tikilluaqqukutsuussavarput, ilaasortatsinnut meeqqanullumi pitsaasumik kinguneqartussaammat, SIK-p siulittaasua oqarpoq.
Nutaanik akitsuusersuiunnaarlusi
Neqinut, kaffinut tiinullu akitsuutit peerneqassappata, nunatta karsia akitsuutinit taakkuninngaanniit 20,5 milliuunit koruuninik ukiumut isertitaqartassanngilaq.
Taamaammat imaaliallaannarlugit peerneqarsinnaanngitsut, Naalakkersuisut isumaqarput.
- Sioqqutsisumik misissuinani, tamatumalu sunniutissai qulaajaaffiginagit, ataatsimut isigalugu sipaaruteqarnissaq piviusunngortinneqarsinnaanngitsoq Naalakkersuisut isumaqarput, aningaasaqarnermut naalakkersuisoq, Asii Chemnitz Narup (IA) allappoq.
Naalakkersuisut akitsuutinik allannguinissamik misissuerusupput, suliarli akileraartarnermut akitsuusiisarnermullu aaqqissuusseqqinnissamik ukiaq manna suliaqarnissamut atatikkusullugu.
AAMMA ATUARUK Demokraatit akitsuusersuiniarunnaartut
Jess G. Berthelsenip aningaasat suminngaanniissanersut annerusumik oqaaseqarfigisinnaanngilaa.
- Suminngaanniit aaneqarsinnaanersut uanga maannakkut tikkuaasinnaanngilanga. Kisianni SIK ukiut taamannanngortuni oqariartortuaannarpoq, akitsuusiinerit allallu sakkugeqattaarnagit suliffinnik ataavartunik pilersitsisoqarniarli, soorlu aatsitassarsiornerit aallartinniarlik, taamaasillutik aningaasat amerlanerusut nunatta karsianut isertinneqarsinnaaniassammata, SIK-p siulittaasua, Jess G. Berthelsen Qanoruumut tallimanngormat oqarpoq.
Demokraatit siunneruutaat Inatsisartut sisamanngormat siullermeerlugit oqaluuseraat. Novembarip ulluisa qulingiluaanni aappassaaneerneqarnissaat pilersaarutaavoq.