SIK-p kissaataanut Naalakkersuisut tunngaviusumik isumaqataapput

Suliffissat amerlanerusut pilersinneqarnissaannik, aatsitassarsiornerup sukkanerusumik ingerlalernissaanik, takornariaqarnerup inerisarneqarnissaanik kiisalu aalisakkat raajallu naammassillugit tunisassiarineqartalernissaannik Sulinermik Inuussutissarsiuteqartut Kattuffiannit kissaatitut ippassaq ilaatigut taaneqartut Naalakkersuisunit ilalernartinneqarput.
Allattoq Thora H. Nielsen
maajip 02-at 2014 16:25

-SIK-p siulittaasuata oqalugiaataa Naalakkersuisut suliniutaannut naapertuuttunik arlalinnik imaqarpoq. Oqaloqatigiinnerit pitsaasut ingerlattareerlugit isumaqarpunga oqaloqatigeeqqinnissamut piffissanngoqqittoq. Taamaattumik SIK-p siulittaasuata qanittumi ataatsimeeqatiginissaa naatsorsuutigaara, siunnersuutit timitalerneqarsinnaanerat eqqarsaatigalugu, Naalakkersuisut sinnerlugit Jens-Erik Kirkegaard nassuiaavoq.

Aamma oqarpoq aatsitassarsiorfinnik aallartittoqapallannissaa anguniarlugu aatsitassanik piiaanissamut akuersissutinik marlunnik naalakkersuisut siorna tunniussisimasut, tassanilu Nuup kangerluata qinnguani saviminissarsiorfissamut London Miningimut kiisalu Qeqertarsuatsiaat kujataanni rubiinisiorfissamut safirisiorfissamullu True North Gemsimut tunniunneqarput.

Suliffissaaleqisut 4.400-t ikilisinneqarnissaat anguniarlugu suliffissanik pilersitsinissamut SIK-p siunnersuutai Naalakkersuisut taamaalillutik tunngaviusumik ilalernartikkaluarlugit kissaat ataaseq Jens-Erik Kirkegaardip akiuminaatsippaa, tassalu aningaasanut inatsimmi amigartooruteqarluni ukiuni marlunni-pingasuniluunnit suliffissanik pilersitsinissaq siunertaralugu pilersaarusiornissamut tunngasoq.

-Taanna imaaliallaannarlugu akiuminaappoq, assigiinngitsunik nalilersuinernik imaqartussaavoq aamma aningaasanut inatsit Inatsisartunit suliarineqarlunilu akuersissutigineqartarmat. Siunersuutilli siunertaa paasisinnaagaluarlugu imaaliallaannarlugu aappimik naaggamilluunnit akisinnaanngikkallarpara, Jens-Erik Kirkegaard oqarpoq.

Naalakkersuisunit illuatungiliuttut Inuit Ataqatigiit SIK-p kissaataannut tunngaviusumik aamma isumaqataapput. Siulittaasuugallartoq Aqqaluaq B. Egede isumaqarpoq illoqarfiit nunaqarfiillu isorliunerusut, taakkualu inuisa atugaannut tunngasut sulisartut ulluanni oqaluuserineqartuni amigaataasut. Aamma isumaqarpoq aatsitassarsiorneq tamanik aaqqiinavianngimmat akileraartarnikkut aaqqissuusseqqittoqartariaqartoq.

-Ataatsimoortumik iliuuseqarnissap ersersippaa aatsitassarsiorneq tamakkiisumik aaqqiinavianngitsoq. Inuiaqatigiit tamatta periarfissavut suunersut misissortariaqarpavut. Sulisartut akissaatikinnerusut ullumikkut akuersaarneqarsinnaanngitsumik inissisimanerat akileraartarnikkut aaqqissuusseqqinnikkut atugarissaarnerup nunatsinni qaffatsinnissaa siunertaralugu suleqatigiissutigisariaqarpavut, SIK aamma peqatigalugu, Aqqaluaq B. Egede oqarpoq.