SIK-p immikkoortortaqarfii naammagisimaarinnittut
- Peqatigiiffitsinninngaanniit isumaqatigiinniarneq sivitsormat allatut ajornartumik taamatut aalajangersimaneq akuerisimavarput, Aasianni SIP-imi siulittaasoq Qujana Fleischer oqarpoq.
Sulinermik Inuussutissarsiuteqartut Kattuffiata Namminersorlutik Oqartussallu aningaasarsiat pillugit isumaqatigiinniarnerat siornali ingerlanneqartup inerneri, qaammatit pingasut qaangiuppata aatsaat atuutilernissaat, SIK-p naatsorsuutigaa.
Tapit suliarineqarnissaat isumaqatigiinniarnissap tulliani suliarineqassasut illua tungeriit isumaqatigiissutigigaat, Jess G. Berthelsen oqarpoq.
Tamannalu Immikkoortortaqarfiit ilaasortaannut marloqiusanik isumaqalersitsivoq.
- Ilaasortat ilaasa naammagisimaarpaat, ilaalli utaqqisinnaanngilluinnarput, Upernavimmi SIP-imi siulittaasup tullia, Lars Eskildsen oqarpoq.
Taassuma Upernavimmi peqatigiiffitsik SIK-p aalajangerneranut akuersaarnera erseqqissaatigaa.
- Una akuersaarparput, ilivitsumik ikkunneqarnissaa isumaqatigiinniarnerup tullianut, tapiaqqat piiginnarlugit, Lars Eskildsen oqarpoq.
AAMMA ATUARUK Ilaasortat utaqqeqqittariaqarput
Uummannami, Ilulissani, Maniitsumilu immikkoortortaqarfiit ilaasortamik aningaasarsiamik qaffaassutissaat utaqqeqqissinnaanngikkaat tunngavilersuutigalugu, isumaqatigiissutit tapeeqqanik allannguiffiunngitsut naammagisimaarlugit akueriinnartariaqaraat KNR-imut oqaatigaat.
Aasiammiut aamma taamatut misigipput.
- Utaqqisinnaanngikkaluarpaat, utaqqikatapput allatut ajornartumik, Qujana Fleischer oqarpoq.
SIK-mut ilaasortat agguaqatigiisillugu 2 koruunit 15 ørenillu aningaasarsiaat qaffaateqassapput.