SIK-p immikkoortortai amerlanerussuteqarluartut akuersaarput
SIK-p aningaasarsiat pillugit pisortanik isumaqatigiinniarnera inissippoq. Siulittaasup, Jess G. Berthelsenip oqaatigaa ilaasortat amerlanerussuteqarluartut ukiuni pingasuni tulliuttuni aningaasarsiat 10,13 procentimik qaffannissaat akuersaaraat.
Allattoq Lotte Holm
marsip 25-at 2009 13:28
Taamaalilluni isumaqatigiinniartarnernut siullernut marlunnut, aningaasarsiat 8 procentimik qaffanneqarnerannik kinguneqartunut sanilliullugu, maanna pitsaanerusumik angusaqartoqarpoq.
Isumaqatigiissutini suliamik ilinniagaqarsimasut akissarsiaasa qaffaavigineqarnissaat pingaartinneqarpoq. Qaammammusiallit qaammammut 347 koruuninik nalunaaquttallu akunnermusiallit tiimimut 2 koruuninik qaffaavigineqarnissaat isumaqatigiissutigineqarpoq, taakkua saniatigut soraarnerussutisianut tunngasut aamma qaffaavigineqarput. Aningaasarsianik qaffaanissamik isumaqatigiissut pisortat suliffeqarfiini atorfilinnut, soorlu allaffimmiunut, nakorsat allattaannut, peqqissaasunut, eqqaavilerisunut portørinullu, katillugit 6.000-inut sunniuteqassaaq.
