SIK-p ilaasortai taarsiiffigitittartut amerliartorput

Namminersortuni pisortaniluunniit sulisartut SIK-mi ilaasortat sulisitsisuminnit eqqunngitsumik pineqartartut arlaqaleriartortut, SIK-p aviisia Sikkersoq allaaserisaqarpoq.

SIK-mi ilaasortat eqqunngitsumik pineqartartut, kattuffitsik aqqutigalugu voldgiftimut, tassa eqqartuussivimmi isumaqatigiissitsiniartartoqarluni suliassanngortitsisarput. Suliassanngortitsisartullu eqqartuussivimmi isumaqatigiissitsiniartartumit illerneqartalerput.

Sikkersoq aamma allappoq sulisartut suliffimminnit eqqunngitsumik siorna pineqarsimasut, aningaasarpassuarnillu taarsiiffigineqartut arlaqartut, tassaasut kommunini sulisut.

Qeqertarsuarmiu SIK-mi ilaasortaq 150.000 koruuninik Qeqertarsuup kommunianit taarsiiffigineqarpoq, naartunermi nalaani kommunip soraarsissimammagu.

Aasiaat kommuniata sulisuni eqqunngitsumik soraarsimmagu 80.000 koruuninik akiligassinneqarpoq.

SIK-mi ilaasortat suliffimminnit eqqunngitsumik pineqarsorisut imaluunniit suusupagineqartut kattuffimmut akuttunngitsumik siarnertuartarput.

Sinerissami sulisut sinniisaat pikkorissarneqartarnerat pisussaaffitsillu tunngavigalugu suliassiissutigineqartartut amerliartortut SIK-p siulittaasua Jess G. Berthelsen oqarpoq.

SIK-p siulittaasua aamma oqarpoq sulisitsisut namminersortuugaluarpata pisortaagaluarpataluunniit pisussaaffitsik naammassiniartariaqaraat, ingammik isumaqatigiissutaareersut najoqqutaralugit sulisitsinissartik.

SIK-p siulittaasua Jess G. Berthelsen aamma isumaqarpoq sulisitsisut isumaqatigiissutit pillugit pikkorisarnerusariaqartut.