SIK-p demokratii nalliuttorsiutiginiaraa
SIK naapertorlugu Qassimiuaarneq 2016 oqaluttuarisaanermi siullerpaamik politikkikkut oqallinnissaq taama ittoq maanna piviusunngulerpoq.
Sulisartut kattuffeqalerneranniit ukiut 60-inngornerat nalliuttorsiutiginera tunngavigalugu SIK'p Qassimiuaarneq aallarniutigaa
Qanga, ullumikkut siunissarlu aallaavigalugit demokratii, ataatsimoorneq, inuillu nalliuttorsiutiginiarlugit.
Oqaluuserisassat ikinngitsut oqinngitsullu oqaluuserineqassapput - aalisarneq, Kalaallit Nunaata siunissaa, takornariaqartitsineq, aatsitassarsiornerlu ilaatigut oqaluuserineqassallutik. Kulturikkut ilanngutassiinissaq aamma pilersaarutaavoq.
Aaqissuussinermik Nuummiikkaluartoq SIK-p nittartakkaminni qularnaveeqquserpaa nunatsinnit tamanit nunanillu allanit peqataasoqassasoq. Kattuffiit 30-t nunatsinnilu partiit tamarmik Qassimiuaarnermi peqataassapput.
Aaqqissuineq suliffeqarfinnit kattuffinniillu arlalinnit tapersersorneqarpoq, ilaatigut Air Greenland, Royal Greenland, Nunat Avannarliit ministeriisa siunnersuisoqatigiiffiat Nutaarsiassaqartitsivillu Sermitsiaq.ag-mit ilaatigut tapersersorneqarlutik.
Namminersorlutik Oqartussat aamma tapersersuisunut ilaavoq, Qarasaasialerinermut Aqutsisoqarfik nittartakkakkut toqqaannartumik aallakaatitsissammata.
Qassimiuaarneq ulluni pingasuni uani toqqaannartumik malinnaaffigineqarsinaavoq.
Aaqqissuussineq kalaallit tuluillu oqaasii atornerullugit ingerlanneqassaaq.
Qassimiuaarneq 2016 Nuup qeqqani, Nuuk Playgroundimi, aqagu marlunngornermi ullaakkut qulinut ammarneqassaaq, maanilu Kommuneqarfik Sermersuup borgmesteria Asii Chemnitz Narup SIK-llu siulittaasua Jess G. Berthelsen tikilluaqusillutik oqalugiassapput.
Kikkut tamarmik peqataanissamut tikilluaqqusaapput.
