SIK: Orsussap akia malittaralugu akinik allanik apparterisoqartariaqarpoq

Orsussap akia malittaralugu suliffeqarfiit arlallit akigititatik appassagaat, SIK-mit piumasarineqarpoq

Orsussap akia 2014-imiilli 74 ørinik akikillineqarsimavoq. Tamannalu pissutigalugu nioqqutissat allat akiisa aamma appartinneqarnissaat, sulisartut inuussutissarsiuteqartullu kattuffiata, SIK-p siulittaasua Jess G. Berthelsen piumasaqarpoq.

- Orsussamik appaasoqarnerata kingunerisaanik ulluinnarni atuisartugut malugissagutsigu taava akinik aamma apparterisoqartariaqartoq, SIK isumaqarpoq, Jess G. Berthelsen oqarpoq.

Akitsuisartut

Taassuma aamma erseqqissarpaa, orsussap akia qaffanneqaraangat aningaasarsiat qaffaavigineqarneq ajortut. Kattuffiullu ilaasortaasa aningaasarsiaasa pisissutigineqarsinnaanerat innarlerneqartarlutik.

Taamaammat suliffeqarfiit akinik appaanissaat SIK-mi siulittaasup neriuutigaa.

- Polaroilip orsussamik akitsuiniarluni nalunaaruteqaannartoq, taava suliffeqarfippassuit akitsuiniarlutik nalunaaruteqartarput. Aamma suliffeqarfiit, Nukissiorfiit eqqarsaatigalugit, Air Greenland eqqarsaatigalugu aammalu Arctic Umiaq Line eqqarsaatigalugu, orsussamullu akinik qaffaasoqarnerata kingorna INI A/S ilaatigut kiassarnermut qaffaasarluni, Jess G. Berthelsen oqarpoq.

Kiassarneq akikilliniartoq

INI A/S-imit oqaatigineqarpoq, kiassarnermut akigititat Nukissiorfiit isumagisaraat, taakkununngalu innersuussisoqarluni.

Illut kiassarnissaannut akit 2016-imi appassasut, Nukissiorfiit decembarimi nalunaarutigineqareerput.

- Kiassarnermut akiliut uuliap akianut naapertuuttussaavoq, uuliallu akia siorna apparpoq, tamannalu 2016-imi akitigut malunniutissaaq, Nukissiorfiit pisortaa Michael Pedersen decembarimi oqarpoq.

Aamma atuaruk Kiassarneq akikinnerulissaaq

Arctic Umiaq Linemi akinik siorna appaasoqarnikuusoq, ersersinniarneqarpoq.

- Arctic Umiaq Linep Sarfaq Ittummut akit 2015-imi allanngortippai, ilaatigut init paarnaartartuniinnissami akit apparlugit ammaannartumi siniffissatut akeqalersillugit. Init paarnaartartut akii taamaasillutik 20 procentimik apparneqarput, tamannalu uuliap akiata appartinneqarnera tamatumunnga pissutaaqataavoq, pisortaq Jette Larsen KNR-imut e-mailikkut allappoq.

Uulia kisimi aalajangiisuunngitsoq

Taamaattoq akinik ukioq manna appaanissamik pilersaaruteqanngitsut aamma erseqqissarneqarpoq. Jette Larsen nassuiaavoq, uuliap akia kisimiilluni aalajangiisuunngitsoq.

- Akissaajaatit allat aamma annertusiartorput. Umiarsuit pisoqaliartortillugit aserfallatsaaliorneqarnissaat akitsoriartuinnartarput, Arctic Umiaq Linemi pisortaq allappoq.

Air Greenlandip akigititai uuliap akinganiinnaanngitsoq aamma aalajangerneqartartut, Air Greenlandimi aningaasaqarnermut pisortaq, Mogens Jensen KNR-imut allappoq.

Air Greenland Københavnimit aallaleraangat uuliamik eqqanaarsaqqaartartoq, taamaaliornikkut uuliap akia qaffakkaangat kingunerlutsitsivallaannginniassammat, taanna allappoq.

Aamma ilanngullugu allappoq, Air Greenlandip akigititai 2014-imili 4 procentinik apparsimasut, sulilu apparsinnaasut.

- Akit appartinnissaannut sulissuteqarnerput ingerlateqqissavarput. Taamaammat 2016-ip ingerlanerani akigut apparteqqinnissaat naatsorsuutigaarput, Mogens Jensen allappoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat