SIK ombudsmandimut maalaaruteqarniarpoq

Umiarsuit sinersortaatit atorlugit angalatitsiviup Arctic Umiaq Linep tuniniarneqarnerani, ingerlatsivimmut ataasiinnarmut pisiarinnittussarsiuussisoqarsimanera

Sulinermik Inuussutissarsiuteqartut kattuffiata SIK-p siulittaasuata kukkunerunerarpaa.

Jess G. Berthelsen aperaarput, sooq ombudsmandimut maalaaruteqalersaarnersut.

- Marlunnik tunngaveqarpugut, siullermik annilaanngatigaarput ilaasortatta sinerissamut nikissinnaanissaat killilersorneqalissasoq. Nalunngilarpummi utaqqisut amerlasaqisut, paasivarpummi aamma takornariat aallaaviginerullugit taakkua angallassiniartut, Jess G. Berthelsen oqarpoq.

Nangipporlu:

- Aappaattut ilaasortatta qulakkeeriffigineqarsimannginnerat, januaarip kingornatigut atorfeqaannarsinnaanissaannut, taakkua marluk naammagittaalliutiginiarpavut, oqarpoq.

Taamatuttaaq Jess G. Berthelsenip tunngavilersuutaasa ilagaat, umiarsuit sinersortaatit ukiuunerani allani attartortinneqartalerpata sinerissami SIK-mi ilaasortat mattunneqartussanngornissaat.

- Tassami paasivarput ukiuunerani taakku umiarsuit attartortinneqartassasut allanilu angalasassallutik, taamaattumik SIK-p ernummatigaa nunatta ukiuni arlalinni kinguariartinneqarnissaa ilaasortagut nikerarsinnaajunnaarpata, Jess G. Berthelsen oqarpoq.

Jess G. Berthelsen erseqqissaavoq, taama maalaaruteqarunik ombudsmandip isumaqatigineraatik isumaqatiginnginneraatilluunniit uppernarsaatissarsiniaritsik, kiisalu inatsisartunngortussanut tamanna tusaatissatut tigusassaannik periarfissiinerusinnaasoq.

Jess G. Berthelsen aperaarput, Arctic Travel Group sumik ajoqutitaqarnersoq.

- Arctic Travel Group imminermini akornutitaqanngilaq, aamma taakkununnga immikkuullarissumik akerliunngilagut, taamaallaanuna periaaserineqartut maannakkut uparuarigut aammalu ilaasortatta angalasinnaanissaannut killilersuineq taanna ernummatigigipput, Jess G. Berthelsen

SIK-p Arctic Umiaq Line ullumikkut ataatsimeeqatigissavaa.