SIK nutaamik allaffeqarfiliulersoq

SIK aalisartut piniartullu kattuffiat KNAPK illoqatigalugu Nuummi Aqqusinersuarmi allaffeqaraluarpoq, piginneqataassutinili sanilerisaminut tunisimallugu. SIK inini attartukkani ullumi allaffeqarpoq.

Allaffeqarfittaassaq Nuummi Nuukullaffimmi siornatigut ukiorpassuarni naatitsisarfiullunilu naasuerniarfiusimasup toqqaviani sanaartorneqassaaq.

- Naatitsivik Kattuffiit Illuannik sananissaq eqqarsaatigalugu ukiup ataasingajaap matuma siorna pisiaraarput, kattuffiup

siulittaasua Jess G. Berthelsen aviisimut Sermitsiamut taama oqaluttuarpoq.

Kattuffiit Illuat soqutigineqanngitsoq

Taassuma aamma oqaatigaa SIK-p sulisartut kattuffii Nuummiittut tamaasa Kattuffiit Illuannut nooqataanissamut qaaqqusimagai, annertuumik ingerlatsinermi iluaqutissanik atorluaasinnaaqqullugit, kattuffiulli siulittaasuata pakatsissutigisaanik aaqqiissutissaq tamanna soqutigineqarsimanngilaq:

- Kattuffiit allat nooqataajumannginnerat uggornalaarpoq, maannali SIK-p qullersaqarfia immikkoortortaqarfialu kiisalu soraarnerussutisiaqalernissamut aningaasaateqarfik illumut nutaamut tassunga nuuttussanngorput, Jess G. Berthelsen aviisimut Sermitsiamut oqarpoq.

Illu 665 kvadratmeterit missaannik angissuseqassaaq.