SIK: Nukissiorfiit piginneqatigiiffinngortinnissaat akerleraarput

- Inuiaqatigiit kallerup inneranik kiassarnikkullu kiffartuunneqarnissaat pisortanit akisussaaffigineqartussaavoq taamaattuartariaqarlunilu, SIK-p siulittaasua, Jess G. Berthelsen taama oqarpoq. Akit ullutsinnut naapertuuttut aallaavigalugit akiligassamik aalajangerneqartarnerat atuisartut sunneeqataaffigisinnaajunnaassagaat SIK-p aamma aarleqqutigaa. Jess G. Berthelsen ualigaa pulaartorigatsinni imatut nassuiaavoq.

- SIK-p Nukissiorfiit aktieselskabinngotinnissaa akerleraa Namminersornerullutik Oartussat suliffeqarfiinik aktieselskabinngortitsisarneq pitsaasunik misilittagaqarfiginnginnatsigu. Assersuutigalugu INI A/S aktieselskabingotinneqarsimavoq tamatumalu kinguneranik inissiat isumagineqarneri pitsaanngillat aappatullu inissianutakiliutit qaffakkiartuinnarsimapput. Royal Greenlandip aamma aktieselskabinngortinnerata kingorna inuiaqatigiit kiffartuunneqarnerat pitsaanerulertutut oqaatigineqarsinnaanngilaq. Nukissiorfiillu aktieselskabinngortinneqaraluarpata akiliutit qaffattariaqalernissaa erngummatigaarput. Atuisartut illersorniarpakka, isumaqarpunga akuersaarneqarsinnaanngitsoq aningaasarsiat pisissutigineqarsinnaanerat maannakkut allaat 7-8 procentimik appariarsimassasoq, INI A/S-imullu akiliutitta qaffannerisigut, Nukissiorfiillu Aktieselskabinngortinneqaraluarpata aningaasarsiat pisissutigineqarsinnaanerisa appariarnissaat suli ernumanarnerulissaaq, Jess G. Berthelsen oqarpoq.