SIK: Naalakkersuisoqatigiilertussanut neriuutikka killeqarput

Naalakkersuisoqatigiilertussat isumaqatigiissutaat Sulinermik Inuussutissarsiuteqartut Kattuffiannit imarisamigut naammagisimaarneqaraluarluni neriulluarfigineqarpallaanngilaq.

- Takusinnaannginnakku aningaasanik nutaanik qanoq pilersitsiniarnersut. Suliffeqarfinnik nutaanik sunik pilersitsiniarnersut. Taamaattumik neriuuteqarnera oqartariaqarpunga killeqartoq naak ukua suliniutit imminermini pitsaagaluaqisut iluatinnaraluaqisullu, Jess G. Berthelsen KNR-imut oqarpoq.

Inuit atugaat qineqqusaarnermi initoqaat. Naalakkersuisoqatigiit isumaqatigiissutaanni taakkua aamma suliarineqarusunnerat SIK-mit nuannaarutigineqarpoq. Siulittaasuammi naapertorlugu ilaasortat pillugit sukataarutigisartakkatik soorlu ilaqutariinnut, utoqqarnut, meeqqanut isumaginninnermullu tunngasut isumaqatigiissummi aamma qitiupput.

Utoqqalinersiat amerlanerusut

Utoqqarnulli atugassarititaasut qineqqusaarutaannaanatik piviusunngortariaqartut Jess G. Berthelsen isumaqarpoq.

- Ilaasortagut amerligaluttuinnartut tusaasarpakka oqaluttut soraarninngornissaminnut akissaqaratik, naak qasuersaarusukkaluarlutik.

- Una oqaatigisaramikku utoqqalinersiaqaleraluarutta akissaqanngilagut taamaattumik suliinnarusuppugut, taannalu isumaqarpunga peqqinnanngitsoq. Ilaasortagut ukiorpassuit inuiaqatigiinnut sullissisimasut isumakuluuteqaratik aamma qasuersaarsinnaasariaqarput.

AAMMA ATUARUK Sulisitsisut: Naalakkersuisoqatigiinnissamut isumaqatigiissut ersarluppoq

SIK malillugu isumaqatigiissutit aamma politikkikkut akuleruffigineqartariaqalertut taanna isumaqarpoq.

- Assigiinngissitsisoqassanngilaq. Qanittukkut politikkikkut akulerunnikkut perorsaasut immikkuullarissumik aningaasarsiaat qaffaavigineqarput, aamma uagut ilaasortagut politikkikkut akulerunnikkut aamma aningaasarsiaat aaqqiivigineqartariaqarput, Jess G. Berthelsen oqarpoq.

Inuit Ataqatigiit siulittaasuat, Múte B. Egede, attaveqarfigigaluarparput ippassarli pingasunngornermi piffissaqanngilaq.