SIK: Lønmodtagernes Garantifond 140.000 koruuninik akiliisariaqarpoq
Tunisassiorfiummi KNT-p sulisuisa akissarsiassaat suliffeqarfiup akiliisinnaajunnaarluni nalunaaruteqarnerata kingorna tunniunneqarnissaannut ajornarsimasut, Lønmodtagernes Garantifond aqqutigalugu tunniunneqarsinnaanersut Sulinermik Inuussutissarsiuteqartut Kattuffiata SIK-p maanna misissornialerpaa, SIK-milu ilaasortat Niaqornaneersut immaqa taava akissarsisinnaanngussapput.
Aamma atuaruk KNT akiliisinnaajunnaartutut nalunaarutigineqartoq
SIK-p siulittaasua Jess G. Berthelsen taama ilisimatitsivoq:
- Suliffeqarfiup KNT-p akiliisinnaajunnaarnerat eqqartuussivimmit nalunaarutigineqarnissaa utaqqiinnarsimavarput, tamannalu nalunaarutigineqaqqammerpoq. qinnuteqaaterpullu Lønmodtagernes Garantifondimut maanna nassiussinnaanngorparput, Jess G. Berthelsen oqarpoq:
- Paasissutissat tigummivagut. Ataatsimoorlutalu qinnuteqaaterput Lønmodtagernes Garatifondimut nassiutissagutsigu ilaasortanit piginnaatitsissummik peqartariaqassaagut. Piareeqqavugullu, kisitsisit tigummivagut, piginnaatitsissummillu tunineqariarutta taava suliaq ingerlateqqissinnaavarput, SIK-p siulittaasua Jess G. Berthelsen oqarpoq.
Aalisartut 140.000 koruuninik pissaqarput
Aalisartut Niaqornaneersut arfinillit katillutik 140.000 koruuninik KNT-mit suli pissaqartut SIK-p siulittaasuata ilisimatitsissutigaa:
- Kisitsit qulaani pineqartoq tassaavoq sulisimanerminni akissarsiassaat suli tunniunneqarsimanngitsut. Akissarsiat allagartaat tigummivagut, taamaammat qularnaatsumik oqarsinnaavugut niaqornani ilaasortavut taakku arfinillit aningaasanik taama amerlatigisunik pissaqartut, SIK-p siulittaasua Jess G. Berthelsen oqarpoq.