SIK: Kommunit akileraarutinik pissarsisariaqarput
Ilanngaasigaanngitsumik akileraartitsisalernissaq inatsisartunit akuerineqassappat
sulisartut nunanit allaneersut, soorlu aatsitassarsiorfinni sanaartugassanilu annertuuni - assersuutigalugu Alcoap Maniitsup eqqaani pilersaarutaani - isertitamik 35 procentianik akileraartalissapput.
Taamaalippat akileraarutinik akiliisitsinissaq pisariinnerulissaaq, sulisut ilaatigut nammineerluni nalunaarsuiffimmik nassiussisariaqanngimmata.
Kisianni aamma siunnersuummut ilaavoq, sanaartortoqarnerani akileraarutitigut isertitat tamarmik nunatta karsianut tuttalernissaat, kommuninut - sulisut sumiiffigisaannut - pinnatik.
Tamanna Jess G. Berthelsenip pitsaasutut isiginngilaa, oqarluni kommunit aningaasaqarnerat ilaasortaminut pingaaruteqartoq.
- Kommunit soorunami aamma pissarsisinnaasariaqarput, kommunimmi ajornartorsioraangata, ilaasortatsinnut tuttarmat, Jess G. Berthelsen oqarpoq nangillunilu:
- Puigussanngilarput kommunit assorujussuaq ajornartorsiormata. Suliffissaaleqisut amerliartorput. Naatsorsueqqissaartarfik naapertorlugu sulisinnaasut 5 procentii sinnerlugit suliffissaaleqipput. Taamaammat akileraarutinit isertitanik taakkunannga kommunit aamma pissarsiaqarnissaat pissusissamisoorpoq, SIK-p siulittaasua oqarpoq.
Aatsitassarsiornermi sanaartukkani angisuuni, suliat aallartisarneranni, sulisut akileraarutaasa ilaat kommuninut tugatik, tamakkerlutilli Nunatta Karsianut tuttarnissaannik Naalakkersuisut sinersuuteqaramik tunngavilersuutigaat, suliat aallartisarnerannut atatillugit pisortanut aningaasartuutit tamarmik Nunatta karsianit akilerneqartarmata.
Kisianni Jess G. Berthelsen tamatumunnga akerliugaluarluni agguaqatigiittarnissamik allaanerusumik siunnersuutissaqanngilaq.
Siunnersuutip ilagaa, sanaartukkat naammassereerneranni, suliallu ingerlalernerani, akileraarutitigut isertitat agguarneqartassasut, kommunit 75 procentiannik pissarsillutik sinnerilu 25 procentit Nunatta Karsianut tuttassallutik.
