SIK: Junnuk sulisartut ikinngutivissuaraat
Jonathan Motzfeldt
pillugu
Eqqaaniut
Ajuusaarutigeqisannik sisamanngornermi ullup qeqqata kingorna tusarlerneqarpunga Junnuk toqukkut qimaguttoq.
Inuk Ukiorpassuarni suleqatigisimasaq, ikinngut kammalaat toqukkut qi-maguttoq tusarlugu eqqarsaaterpassuarnik qaffakaatitsivoq.
SIK-mi suleqataalerninniit Junnuk ilisarisimalerpara anguniakkaminut qa-sutsuilluni sulisartoq. Junnuup ilisarnaatigaa isummaminik aaliangiusima-saqarluarluni naapititseriaallaqqissutsini - sumiluunnimmi suleqataaner-minni illuatungeriit isumaqatigiissinnaajunnaaraangata - sapinngisamik kikkut tamarmik inooqataaffigisinnaasaanik aaqqiissuteqarniartarpoq, naak soorunami tamanna tamatigut naammassineq ajornakusoorsinnaasaraluartoq.
Junnuup naalakkersuisutut siulittaasuunermi nalaani Kattuffiit isumaasa tusarnissaat pingaartittarpaa, taamaammallu inuiaqatigiinnut annertuu-mik attuisussamik aaliangiiniartoqalersilluguileqqorisarpaa aggersarlunga isumannik tusarniaaffigisarlunga, imaanngitsoq isummat tamaasa atortarmagit, kisianni nammaqatigiissitsiniarnerminut nalunanngilaq atortarai, aammalu qanorluunniit ulapitsigigaluaraangami oqaloqatiginiarneqartilluni matuni ammatittuaannarpaa, taamatullu ”inuinnarnut” qanittuararsuarmik suleqataalluni.
Junnuup poliitikeritut aamma ilisarnaatigaa uummateqarami angisuumik, naak tamanna politikeritut suleqatigiisissallugit ajornakusoorsinnaagaluartoq, inuuvormi inoqatiminut tunniusimasoq, aammalu inuuvoq inuit uummammiuminnik aniatitsivigisinnaasaat.
Taamatullu suleriuseqarnerata aammattaaq inatsisartuni siulittaasutut inissisimanerani malunnarluarpoq, tassami Inatsisartuni siulittaasuunerata nalaani Inatsisartut ataatsimiittarnerat assut torersumik ingerlanneqartarmat, tassami Partiimi sumi inissisimanersut apeqqutaatinnagit Inatsisartuni ilaasortat siulittaassuuffigisimavai.
Junnuk Inatsisartunut siulittaasuunermini Sulisartut ullorsiorneranni peqataanissani pingaartittuarsimavaa, taamatullu periarfissaqartilluni ullorsiornitsinni oqaaseqarfigiuartarsimavaatigut.
Junnuup Sulisartunut ilumoortuunini takutittarpaa Naalakkersuinikkut suliaqarunnaaraluarluni Sulisartut ullorsiorneranni tamatigut SIK-mut alakkartuartarnermigut.
Junnuup inuttut aamma ilisarnaataasa pingaarnerit ilagaat inoqatiminut isumassuisuunini, tassami nalunngisani sutigulluunniit napparsimalersimappata alakkalaarlugit qiimmassarnissaat pingaartittarmagu.
Junnuullu aamma ilisarnaatigisaata ilagaat qanorluunniit inoqatiminik nuanniitsigisumik pineqarsimatigigaluaruni isumakkeerfiginnittarnini, isumaqarpungalu taanna nukittoqqutaasa annertunerpaartarigaat, tassami nunarsuarmi Junnuttut ittut Politikkikkut aqutsisuugaluarpata Nunarsuarput ullumikkut allatut isikkoqaqqajaqaaq, isumakkeerfiginninnerummi suna tamaat aqutsissiuussinnaasarmagu.
Junnuk uagutsinnut ilisarisimannittunut maqaasinassaqaaq, sukkulluun-niimmi ornillugu isumasiorsinnaasaratsigu, misilittakkanilu aallaavigalugit aqqutissiuussisinnaasarnera tamatta maqaasissannguatsiaqaarput.
Junnuk inuiaqatigiinnut kalaallinut pingaaruteqaqisoq akornatsinniikkunnaarpoq, Junnuup eqqaaneqarnera ataqqinartuuli.
Jess G. Berthelsen
SIK-p siulittaasua
Nuuk, ulloq 28. oktober 2010
