SIK-juna isumaqatigiinniarusussuseqanngitsoq

- SIK isumaqatigiinniarfigisinnaalerumallugu isumaqatigiissitsiniarnissaq pillugu suliassamik tunniussinikuuvugut, suliarlu naammasseqqammerluni. SIK GA-mik ukiuni marlunni isumaqatigiinniarusussimanngitsoq suliami pineqartumi inerniliunneqarpoq. Taamaammat GA-p isumaqatigiinniarusussimannginneranik Jess G. Berthelsenip oqariartuutaa eqqunngilaq, GA-p pisortaa Henrik Leth radioaviisimut oqarpoq.

SIK-mi ilaasortat suliffeqarfinni Sulisitsisut Peqatigiiffianni ilaasortaasuni sulisuusut suliumajunnaarnissaannik SIK ippassaq ilimasaarivoq, GA-p, taamatullu Henrik Lethip tupigusuutigeqisaanik.

Tassa suliumajunnaarnissamik tunngavilersuutiginiarneqartut Henrik Lethip tupigusuutigimmagit.

Qaammarsaanermut Ilinniartitaanermullu Aningaasaateqarfimmut Sulinngiffeqarnermullu aningaasaateqarfimmut GA-p akiliiumannginnera ilumuunngitsoq Henrik Leth aamma oqarpoq.

Suliumajunnaarnissamik SIK-mit ilimasaaruteqarnerup malitsigisinnaasai Henrik Lethimit ernumassutigineqarput, sulisartoqarnermi eqqissiviilliortoqaratarsinnaanera ernummatigineqarami.

- Sulisut namminersortuniittut SIK-mullu ilaasortaasut 10 procentiunnginnamilluunniit, sulisut pineqartut SIK-mut attaveqarniarnerat ilaatigut ajornakusuulersinnaavoq, siunissamilu anguniagassat eqqarsaatigissagutsigit tamanna ernumanarsinnaavoq, GA-p pisortaa Henrik Leth radioaviisimut oqarpoq.