SIK: Isumaqatiginninniarnerit imaannaanngitsuussapput
Pisortat aningaasakilliornerata nalaani, SIK-p pisortallu akornanni isumaqatigiinnialerpata sulisut kattufiata anguniagaasa ilaat imannanngillat.
- Nunatta aningaasaqarniarnera pitsanngorsaaviginiarneqassappat, aammalu isumaqatigiinniarnerit eqqarsaatigalugit pitsaanerusumik inissisimasoqassappat, taava pingaaruteqarluinnaqqissaarpoq suliffissaaleqinerup akiorniarnissaa.
- Tassami suliffissaaleqineq qaffakkiartuinnartillugu inuit tamatuminnga eqqugaasut amerligaluttinnartussaaput, Sulinermik Inuussutissarsiutillit Kattuffiata siulitaasua Jess G. Berthelsen oqarpoq.
SIK-p pisortanut isumaqatigiinniarneri ataasinngorpat, apriilip 24-anni aallartissapput.
Jess G. Berthelsenillu ilimagaa isumaqatigiinniarnerit imaannaanavianngitsut. Jess G. Berthelsenilu oqarpoq, isumaqatigiinniarnerit kingulliit naammasseqqammersut eqqarsaatigalugit, tassa Peqqissaasut Kattuffiata angusaat 4,81-iusoq annertugisassaanngimmat, taamaattorli 4 - 5 procenti SIK-p naammaginavianngikaa oqaatigalugu.
- Eqqaamaneqartariaqarpoq Peqqissaasut uagut ilaasortatsinnit aningaasarsiaqarnerugaarput, taamaattumik soorunami pissusissamisuussanngilaq ilaasortatta akissarsiaat taamaallaat 4-5 procentimik qaffaavigineqassappata, tassami procentit taakku eqqarsaatigigaanni, ilaasortatta aningaasat tigusassaat annikutsuarakasiussammata, Jess G. Berthelsen oqarpoq nangillunilu.
- Taamaattumik 4-5 procentimik taamaallaat qaffaavigineqassagutta tamanna naammaginavianngilarput, tassami aningaasarsiat pisissutigineqarsinnaanerat taama maanna appariarsimatigimmat.
Pisortat akinik qaffaasarnermikkut aningaasarsiat pisissutigineqarsinnaaneri innarlertaraat, Jess G. Berthelsenip oqaatigaa, assersuutitut taallugu inissianut aningaasartuutit ukiuni kingullerni 19 procentimik qaffariarsimaneri.
- Namminersorlutik Oqartussat annertunerusumik taamatut qaffaaniarunik, nalunngiinnassavaat tamanna isumaqatigiinniarnermi tuniluutissasoq aammalu aningaasarsiat pisissutigineqarsinnaanera soorunami milliliiffigineqassasoq, Jess G. Berthelsen taama oqarpoq nangillunilu.