SIK: Imermik tunisassiulersinnaanissamut piareeqqasimagaluarpugut

Tunisassiorfiup umiarsualivissallu sananeqarnissaasa kinguarsaasuummata, Qeqertarsuarmi imermik tunisassiulernissaq ukiup ataatsip missaanni kinguartussanngortoq Greenland Springwaterimit nalunaarutigineqarpoq.

Tuniniaanissap 2007-imi aallartinnissaa pilersaarutigineqarsimagaluarpoq, aatsaalli 2008-p aallartilaarnerani tamanna pisinnaassasoq Greenland Springwaterip ilimagaa.

SIK-p suliffissaqartitsiniarnermut aningaasaateqarfia peqataalluni imermik tunisassiulernissaq pillugu suleqataasimagaluarpoq, piginneqataasutullu inissinniarnikuulluni, iluatsinngitsumilli.

Qeqertarsuarmi Uunartuarsummi puilasup ernganik tunisassiaralugu nioqquteqarnissamut akuersissut naalakkersuisunit ukioq manna marsip qaammataani Greenland Springwaterimut tunniunneqarpoq, imermillu tunisassiulernissaq kinguartussanngormat SIK-mit ajuusaarutigineqarpoq.

Siulittaasoq Jess G. Berthelsen ima oqarpoq:

- Miserratigineqassanngilaq SIK-p suliffissaqartitsiniarnermut aningaasaateqarfia peqataalluni imermik tunisassiulernissaq pillugu suleqataasimammat, suliffeqarfimmillu piginneqataasutut inissinniarnikuulluni. Taamaattumik suliffissat eqqarsaatigalugit ajuusaarnarpoq taamatut kinguaattoortoqarmat, naak neriorsuisoqaraluartoq siusinnerusukkut aallartittoqarsinnaasoq, Jess G. Berthelsen oqarpoq, nangillunilu:

- Neqerooruteqaratta suna tamaat piareersinnaasutut inissikkaluarparput, taamaattorli salliutinneqanngilagut, Jess G. Berthelsen naggasiivoq.

Ukiuni tulliuttuni 240 millioni koruunit aningaasaliissutaassasut Greenland Springwaterip naatsorsuutigaa.