SIK ilaasortamik atugaat pillugit misissuilerpoq

Sulisinnaasut ikiliartuinnarput, tamannalu tamamit peqataaffigineqartumik iliuuseqarfigisariaqalersoq naalakkersuisut siulittaasuata Hans Enoksenip ukiortaami oqalugiaatimini eqqaavaa. Sulinermik Inuussutissarsiuteqartut Kattuffiat suliniuteqalereerpoq, siusinnerpaamik ukiup affaa qaangiuppat kinguneqariartussangatinngeqartumik.

Pisarnertut naalakkersuisut siulittaasuat Hans Enoksen oqalugiaateqarpoq nalunaaquttap akunnerata affangajaanik sivisussuseqartumik. Sulisinnaasut ikiliartornerat uparuagaasa ilagaat.

- Akueriinnarsinnaajunnaarparput allaffissornermi kiffartuussinermilu pisariaqanngitsumik aningaasarpassuarnik atuinerput. Sulisinnaasut ikiliartorput tamatumalu kingunerisaanik akileraartartut ikiliartorlutik, akerlianillu aningaasalersugassat

annertusiartuinnarput.

Suliffissaaleqisutut nalunaarsorsimasut amerlassusaat nikerartuarpoq, sulisinnaasut 8 procenterigaat oqaatigineqartarluni. Imaaliallaannarli sulilersinneqarsinnaasannginnerat SIK-mit arajutsisimaneqanngilaq.

-Soorunami suliffissaqanngitsut oqarfigineqaannarsinnaanngillat uunga suliartortariaqarputit. Sumut iluaqutaava taassuma suliffissaaleqisup assai killormut sammisimappata imaluunniit suliffimmut tassunga tulluanngippat. Taamaattumik pingaaruteqartorujussuuvoq tamatta ilungersuutigissallugu suliffissaaleqisut nuannarisaannik aamma tulluartumik nassaarnissaq. Sulisitsisummi sumut iluaqutigissavaat sulisartup taanna nuannarinngippagu.

Jess G. Berthelsen aamma oqarpoq sulisartut sulilersinniarlugit atugaat, soqutigisaat, pikkorissarsimaneri allallu paasiniaaffigineratigut iliuusissat nassaarineqarumaartut.

-Pilersaarutigaarput misissuinerit ilaasortatta pikkorissartinneqarnissaannut tunngatillugu misissuinerit siusinnerpaamik ukiup affaa qaangiuppat naammassereersimassagigut.

SiK-p siulittaasuata oqaasii Naalakkersuisut siulittaasuata isumqaataaffigai.

- Sulisartukkut ilinniartitaanerat annertusarlugu ingerlaqqissaagut Sulisartut Højskoleat atorluarlugu. Qujanaq sulisartut nunatsinnik

napatitseqataalluarnissinnut. SIK-p siulittaasua Jess G. Berthelsen taama oqarpoq.

SIK ullumikkut 10.00-it sinnilaarlugit ilaasortaqarpoq.