SIK: Ikiorsiissutisisarneq aaqqinneqartariaqalerpoq
decembarip 30-at 2004 05:27
Ikerasammi Royal Greenlandip sulisui suliassaaleqinerminni angerlatitaagaangamik kommunini ikiorsiissutinik pissarsisannginnertik paasiuminaatsippaat.
Uumannallu kommunianit SIK-millu oqaatigineqarpoq ikiorsiissutinik pissarsisannginneq SIK-mut kommuninullu attuumassuteqanngitsoq.
Ikiorsiissutinillu pisarneq namminersornerullutik oqartussat peqqussutaanniittoq, allamiinnanilu.
Soraarsitaaqqaarluni aatsaat ikiorsiissutinik pissarsisinnaasarneq maanna inatsisineereersoq ippassaq Uumannap kommunianit oqaatigineqarpoq.
SIK-p siulittaasua Jess G Berthelsen isumaqarpoq naalakkersuisut aaqqiisariaqalersut ikiorsiissutisisarnermummi maleruaqqusat qangali eqqartorneqalermata, ilaasortatillu eqqugaajuarmata.