SIK GA-lu aalisariaatseq nutaaq ernumassutigaat

Sulisitsisut peqatigiiffiata niuernermut ataatsimiisitaliaani siulittaasup, Henrik Leth-ip aalisarnermut Naalakkersuisumut kaammattuutigaa Sulinermik Inuussutissarsiuteqartut Kattuffiat inatsisinik allannguinnginnermi - isumasiorneqaqqaassasoq.

Suliffippassuit uani eqqartorneqarput, taama oqarpoq Sulisitsisut peqatigiiffiata aalisarnermut ataatsimiisitaliaani siulittaasoq Henrik Leth.

  - Paasinnittaasera malillugu isumaqarpunga, kingunerilluarsinnaagaa          aalisakkerivinnik matooraasariaqalerneq aalisarnerillu ingerlanneqarneranik unititsisariaqalerneq.

Polar Seafood-imi siulittaasoq isumalluannginnerarpoq, Siumup aalisarnermut politikkini allanngortissallugu ilimasaarutigereeraalu.

-Isumaqarpunga siunnersuut eqqarsaatigilluagaanngitsoq siunertaalu ersarissumik oqaatigineqarani.

Taama Henrik Leth nassuiaavoq, tunisassiorfiutini sinnerlugu allallu aalisarnermik tunisassiorfiutillit sinnerlugit maanna oqaaseqarnermini.

Naalakkersuisut aalisarnermut nutaamik isummernerat sulisitsisunit ernummassutigineqarpoq.  Aalisarnermut akuersissutinik pisinnaanani, saniatigullu aalisakkeriviuteqarluni. Siumup aalisartut ikiorniannguarlugit, Karl Lyberth-ip aalisarnermut isummernini aalisakkerivinni sulisorpassuarnut isumalluaraluartunut eqquissasoq, Henrik Leth oqarpoq.

SIK aperivarput tunisassiiortut assinganik ernumassuteqarnersut.

- Una inatsit gummistøvle paragraffimik taasartagaat atuutilerneqassappat taava soorunami naatsorsuutigaara kikkunnut tamanut atuutissasoq. Royal Greenlandi eqqarsaatigalugu, nalilersuisariaqassaaq kilisaataatini imaluunniit tunisassiorfini tunissanerlugit, SIK-mi siulittaasoq Jess G. Berthelsen oqarpoq.

Sulisitsisut suliatigullu peqatigiiffik isumaqatigiinneq ajoraluarlutik, sammisami uani assigiimmik nipaqarput.

- Uani taamatut aaqqissuisoqassappat massakkut ernumatigilaarparput suliffeqarfinnik naleqarsinnaanera, Jess G. Berthelsen oqarpoq.

Maannakkorpiaq aalisarneq ima ingerlanneqarpoq, aalisakkat kinguppaallu pisarineqartartut annerpaartaat aalisakkerivinni suliarineqartarmata, taakkulu pisarineqartut pilersuisunit angisuunit pisaasarlutik.

   -Pissutsit ullumi imaapput aalisakkeriviutillit imminnut pilersornerat annertuvoq, tamannalu annaaneqassappat suliffippassuarnik annaasaqassaagut.

Naliliivoq Henrik Leth aalisakkanik pilersuisut sinnerlugit oqaaseqartoq.