SIK eqqartuussisulersuussinialerpoq
Nunatsinni oqaluttuarisaanermi akiligassiissut aatsaat taama angitigisoq pinngitsoortinniarlugu Sulinermik Inuussutissarsiuteqartut Kattuffiat SIK eqqartuussisulersuussinialerput.
Kalaallit Nunaanni Sulisitsisut Peqatigiiffiat GA SIK-llu akornanni tunngaviusumik isumaqatigiissummik unioqqutitsisoqarsimaneranik aalajangertoqarmat SIK 400.000 koruunimik akiligassinneqarpoq.
Nunatsinni eqqartuussisuuneq Søren Søndergård Hansen isumaqatigiissitsiniartoralugu eqqartuussut aalajangerneqarpoq, tassanilu SIK tunngaviusumik isumaqatigiissummi tatigeqatigiinnissami piumasaqaammut unioqqutitsisimasutut pineqaatissinneqarpoq. Maannali SIK-p akiligassinneqarneq nunatta eqqartuussivianut saqqummiunnialerpaa, isumaqaramik nunatta eqqartuussisuunera isumaqatigiissitsiniarnikkut eqqartuussivimmi pineqartumut attuumassuteqarpallaartoq, suliallu ingerlanerani arlalinnik kukkusoqarsimanera pillugu.
SIK-p eqqartuussi-ssu-serisua Aviaja Helms radioaviisimut ima oqarpoq:
-Tunngaviusumi isumaqatigiissummi naqissuserneqarpoq isumaqatigiissitsiniartoq illuatungeriinnit aalajangerneqassasoq. SIK allanik siunnersuuteqaraluarmalluunniit GA-mit tamanna eqquutsinniarneqarsimanngilaq. Eqqartuussisuuneq isumaqatigiissi-tsiniartussatut imminut toqqarsimavoq, uagulli isumarput malillugu tassani pineqartumut attuumassuteqarpallaalereerpoq. Taamaammallu suliap ingerlanerani kukkusumik ingerlasoqarpoq, eqqartuussi-ssu-serisoq oqarpoq.
Tassungali GA isumaqarpoq SIK avaqqutaariniarsarisoq.
Pineqaatissiinermi SIK-p siulittaasua suliffeqarfinnut arlalinnut GA avaqqullugu isumaqatissuteqarnissamik neriorsuuteqarsimaneraneqarpoq, GA-mullu ilaasortaajunnaaqqusilluni.
Akiligassinneqarneq oqaluttuarisaanermi aatsaat taama annertutigigaluartoq, GA suli annerujussuarmik akiligasseeqqusigaluarpoq, tassa 3,5 millioner koruuninik SIK-p akiligassinneqarnissaanik anguniagaqaraluarmat. SIK-p akiligassiissutigineqartut 400.000 koruunit akuerisimagaluarunigit sapaatip akunneri sisamat qaangiutsinnagit akilissagaluarpaat.
