SIK: Assigiinngisitsineq ajornerpaaq
Inatsisartunut ilaasortamut Palle Christiansenimut, Demokraatit, akissuteqaatimini Mette Lynge ilaliivoq maannakkut akiliuteqartannginnermik aaqqissuussineq naapertuutinngilluinnarnerarlugu:
- Taamatut akeqanngitsumik aaqqissuussineq taamaatinneqartariaqarpoq Mette Lynge akissuteqaatimini aalajangivilluni erseqqissaavoq. Tamatumunnga taarsiullugu aningaasat takku inissianik aserfallatsaaliuinermut atorneqartariaqarput, oqarpoq nangillunilu:
- Najukkami torersaarnissamut maleruagassanik sukannersunik atuutsitsilernissaq, soorlu pujortartarnermik imigassartortarnermillu inerteqquteqalernissaq siunnersuutaasoq pitsaalluinnartoq Naalakkersuisut isumaqarput. A/S Inissiaatileqatigiiffik INI maleruagassanik taamaattunik atuutsitsilernissamut Naalakkersuisunit peqquneqassaaq. Kisiannili erseqqissaatigineqassaaq, inissiat inisseeqqiffiusut pigaartoqartinneqartanngimmata nakkutilliisoqartinneqartaratillu ...”.
Taamak oqarpoq innuttaasut qinigaat Ineqarnermut Naalakkersuisoq”, SIK-p siulittaasua Jess G. Berthelsen oqaaseqaateqarpoq, nangipporlu:
- Maannakkummi naalakkersuisooqatigiit naalakkersuisooqatigiilerniarlutik isumaqatigiissutaanni erseqqilluinnartumik allassimavoq innuttaasut pisariaqartitaat ingerlatsineq naligiimmillu atugassaqartitsineq naalakkersuisut sulissutigissagaat.
Nangillugu atuarneqarsinnaavoq naalakkersuisooqatigiinni kissaatigineqartoq tamanna ingerlanneqassasoq inuiaqatigiit siunissamut isumalluartut peqatigalugit nutaaliorusussuseqarneq nammineersinnaanerlu qaffassarumavarput, inuiattut naleqartitavut pingaartillugit ineriartortitsilluta. Nuna ataasiusoq – inuiaat ataatsimoortut tamanna isumaqatigiissutip saqqaani allassimavoq. Immikkoortoq taanna Naalakkersuisooqatigiit isumaqatigiissutaaniittoq Mette Lyngemit eqqarsaatigineqarsimanerluni, ilaqutariit inisseqqinneqarsimasut pillugit apeqqut sammigamiuk?
- Aamma siunnersuutaani innangareersunik isimmitsiniarnerata kingunerissanerpaa nammineq inigisaminnik pigisaqartut – taakkununnga ilanngullugit nammineq aamma Palle Christensen – aammattaaq nammineq inigisaminni imigassartoqqusaannginneq aamma pujortaqqusaannginneq eqqunniarneraa? Mette Lynge ajuusaarpunga, Jess G. Berthelsen, SIK-mit naggasiivoq.
- Naggataatigut apeqqutiginiarpara: Illit eqqortunut aperisimanerpit illit iliuuseqarniarnivit inuit pisinnaatitaaffiinik eqqortitsinera paasiniarlugu, tamannami minnerpaamik ileqqorissaarnissamut aamma ataqqinninnissamut atuuttussaavoq demokratimi sumiikkaluartumiluunniit ileqqorissaarnermik tunngaveqartumi?
