SIK: Aningaasanut inatsit sulisartut atugaannut naapertuutinngilaq

2009-mut aningaasanut inatsit suliffeqarnikkut unammilligassanut naapertuutinngitsoq, SIK isumaqarpoq. Aalisartut ukiuni tulliuttuni ikiliartussasut inassutaavoq, kisianni suliffissalinnut nutsernermi aningaasaliissutit ikittut, inissianillu sanaartornermut aningaasaliissutit ikilineqartut, siulittaasoq Jess G. Berthelsenip tikkuaavoq.
Allattoq Jens Thorin
marsip 02-at 2009 15:34

- Inissialiornermut amerlanerusumik anigaasaliisoqartariaqarpoq, aamma illoqarinnut aallanut nuunnissamut amerlanerusunik aningaasaliisoqartariaqarpoq, SIK-p siulittaasua oqarpoq.

Aalisarneq pillugu ataatsimiititaliarsuup nalunaarusiaani inassutaavoq, aalisartut ukiuni tulliuttuni ikiliartussasut. Kisianni ukioq manna aningaasanut inatsit inuussutissarsiornikkut allanngoriartornermut naleqqutinngitsoq, Jess . Berthelsen isumaqarpoq. Assersuutigalugu inuit suliffissalimmut nutsernissaat eqqarsaatiginagu inissianik sanaartornermut 77 millioni koruunit sipaartoqarpoq.

- Naalakkersuisut oqariartuutaannut taanna assortuuppoq. Isumaqarpungalu, inuit akilersinnaasaannik inissialiortitsisoqartariaqartoq. Maannakkummi inissiat pisiarineqarsinnaasut piginneqatigiilluniluunniit innissiat akisoqimmata, ilaasortavut akissaqanngillat, Jess G. Berthelsen oqarpoq.

Nuttarnerulersitsiniarluni aningaasaliissutit aamma amerlineqarnissaat SIK-p piumasaraa.

- Ullumikkut 1500-it 1600-illu akornanni suliffissaaleqisoqarmat. Sumiiffiit ilaanni sulisinnaasut 11 12 %-iisa missaat suliffissaaleqipput, allanilu taamaallaat 2 %-it suliffissaaleqillutik, Jess G. Berthelsen oqarpoq.

Amerlanerusunik inissialiornissaq suliffissalinnullu nuunnissamut tapiissutit amerlinissaannut, isertitaqarnerusut akileraarutaasa qaffannerisigut akissaqartinneqalissasoq, Jess G. Berthelsen isumaqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq