SIK: Alcoa qaa qaa
Alcoa pillugu sukkanerusumik sulisoqartariaqariaqaraluartoq Sulinermik Inuutissarsiuteqartut Kattuffiat isumaqarpoq. Siulittaasoq Jess G. Berthelsen ima oqarpoq:
- SIK-minngaanniit neriuutigisimagaluarparput aluminiumik aatsitsivik siusinnerusukkut pilersinneqarsinnaassasoq, taamaalilluni maannakkut inuutissarsiutit eqqarsaatigalugit, aamma nunatsinni suliffissaaleqinerup annertusiartornera eqqarsaatigalugu, sukkanerusumik illuatungaanut sangutinneqarsinnaaniassammat, Jess G. Berthelsen oqarpoq.
Alcoap Maniitsup eqqaani aatsitsiviliorniarneranut atatillugu pilersaarutit suliamut tunngasut Naalakkersuisut Inatsisartut 2011-imi ukiaanerani ataatsimiinnissaanni saqqummiuttussaagaluarpaat, paasissutissalli sukumiinerusut utaqqimaaqqaarlugit saqqummiinissaq Inatsisartut aappaagu upernaakkut ataatsimiinnissaannut kinguartippaat. Paasissutissat sukumiinerusut pissarsiarineqarniarnerat Jess G. Berthelsenip pissusissamisoorsoraa, suliarli sukkanerusinnaagaluartoq oqaatigalugu.
Alcoa Norgemi aatsitsiveqareermat Norgemi misilittakkat Nunatsinni naalakkersuisut aallaavigisinnaagaluaraat, Jess G. Berthelsenip oqaatigaa:
- Niuerneq eqqarsaatigalugu ilisimasaqarfigineqarluarpoq, aamma Alcoa Norgemi marlunnik aluminiumik aatsitsiveqarmat. Taamaattumik immaqa ilisimasaqarluartunik, soorlu Norgeminngaanniit tamakkuninnga ilisimasaqarluartunik aalajangersimasumik akilerlugit atorsimagaluaraanni taava isumaqarpunga suliaq immaqa sukkanerusumik ingerlanneqarsimasinnaagaluartoq, Jess G. Berthelsen oqarpoq.
Demokraatit sinnerlugit Inatsisartuni ilaasortaq Niels Thomsen naalakkersuisunut apeqquteqaateqarnikuummat, oqaaseqartikkusussimagaluarparput, akissutigineqartulli suli atuarsimanngimmagit akissummut oqaaseqarsinnaanngikkallarnerarpoq.
