SIK: Alcoa inuiaqatigiinnut iluaqutaakutsuussaaq
Sulisitsisut kattuffiisa GA-p aamma NUSUKA-p pisortaasa naatsorsorsimavaat, Alcoap suliffeqarfissarsuassaani sulisunit akileraarutitigut isertitassat 40 millioni koruuniinnaassasut. Kisianni Jess G. Berthelsen isumaqapoq, Alcoap suliffissuassaa inuiaqatigiinnut pitsaasumik sunniuteqassasoq:
- Isertitaqannginnermiit 40 millioni koruunit taakkua isertinneqarumaartut pitsaanerujussuupput. Taamaattumik isumaqarpunga, inuiaqatigiinnut ataatsimut sunniutissaa pitsaasuusoq, minnerunngitsumik suliffik aalaakkaasoq minnerpaamik ukiuni 60-ini atassammat. Tassa sulisut aalaakkaasut ukiuni 60-ini akileraarutit aalaakkaasut ukiuni 60-ini, taassumalu saniatigut suliffeqarfiit allat pilersineqartussat, ilaatigut Alcoamut sullissisussat, kiisalu Maniitsumi sanaartorneq pilersineqassalluni, Jess G. Berthelsen oqarpoq.
Ilumut aluminiumik tunisassiorfiliortoqassanersoq suli aalajangertoqannglaq, Inatsisartut aalajangernissaat aatsaat ukiamut pissasoq pilersaarutaammat. Pilersaarut Inatsisartunit akuerineqarpat, erngup nukinganik innaallagssiorfissat 2010-mi upernaakkut sanaartorneqalissapput, aatsitsivissarsuarlu aatsaat 2012-imi sananeqalissalluni.
Alcoamulli iluaqutaasussamik Nunatta Karsianut aningaasartuuteqarpat, GA-p pisortaata ernummatigaa akileraarutit qaffassasut, Qeqqata kommuniani taamaallaat iluaqutaasussamik. Tamanna Jess G. Berthelsenip ima oqaaseqarfigaa:
- Kisitisit qanorpiaq issanersut ataatsilluunniit kialuunniit oqaatigisinnaangilaa, periaaseq suna atorneqassanersoq apeqqutaalluinnarmat. Assersuutigalugu piginneqataassagutta aammalu kallerup inneranik atuinermit isertitsissagutta, taava aamma nalilersorneqartariaqarpoq, isertitat aningaasartuutiniit qaffasinnerussanersut, SIK-p siulittasua oqarpoq.
Greenland Developmentimi paasissutissiinermi siunnersorti Ellen Christoffersen Radioavisimut oqarpoq, Aluminiuliorfissap inuiaqatigiinnut sunniutissai pillugit misissuinerit inerneri juuli aallartilaarpat naammasissasut naatsorsuutigineqartoq.
- Uanga erinitalinngilanga, tassami kisitsisinik ersarissunik saqqummertoqartinnagu, Inatsisartut isummernavianngillat, Jess G. Berthelsen oqarpoq.
