SIK akiliisussanngorlugu eqqartuunneqarpoq
Sulisitsisut Peqatigiiffiata aamma SIK-p isumaqatigiissitsiniarnermut aaqqiagiinngissutaanut atatillugu Nunatta Eqqartuussisuunerata Søren Søndergård Hansenip SIK 800.000 koruuninik akiliisussanngorlugu ippassaq eqqartuuppaa.
Allattoq Elisa Isaksen
marsip 15-at 2008 13:15
Nunatta Eqqartuussisuunerata tunngavilersuutigaa SIK-p Sulisitsisut Peqatigiiffiannut isumaqatigiissutip nutarternissaanut pimoorussilluni isumaqatigiinniarsimannginnera.
Tamatuma saniatigut illuatungeriit tassa SIK-p aamma Sulisitsisut Peqatigiiffiata isumaqatigiissutigaat, suliumajunnaarnerit marsip 19-anni aallartitsinnagit isumaqatigiinniarnerit aallarteqqinneqassasut. Illuatungeriit ataasinngorpat naapinniarput aamma SIK-p siulittaasua Jess G. Berthelsen tusagassiuutinut nalunaarummini allappoq, isumaqatigiissutinut piumasaqaataasut 16-iusut tamakkerlugit isumaqatigiinniutiginissaannut SIK piareersimasoq.
