SIK: Akileraarut qaffanneqaannarli
Naalakkersuisullu inuussutissanik orsussamillu akitsuusiiniarnerat pillugu, Jess G. Berthelsen oqarpoq, taamaaliortoqarpat tamanna akissaatikinnernut eqquinerluttussaassasoq.
- Aalajangerniartoqassappat orsussaq inuussutissallu akitsuuserneqassasut taava perusunneruvara akileraarutip procentimik ataatsimik qaffanneqarnissaa taamaalilluni tamanna tamanut naliinnerusumik eqquissammat.
SIK-p siulittaasua, Jess G. Berthelsen taama oqarpoq, Naalakkersuisut siulittaasuata oqalugiaataa tallimanngormat tusarnaareerlugulu.
Aamma atuaruk Akitsuutinik qaffaanissaq Naalakkersuisut aalajangiusimavaat
Akitsuusersuineq akissaatikinnernut eqquissaaq
Naalakkersuisullu Nunatta karsiata amigartoorutaanik qanoq matussusiissanissamut allanik siunnersuuteqannginnerat, Jess G. Berthelsenip maqaasivaa ima nangilluni oqarluni.
- Orussaq 10 ørennguamilluunniit qaffanneqarpat taava suliffeqarfiit pisinarfiillu aningaasartuutaat annertunerulersarput taamaalillunilu inuussutissat akiinik qaffaasariaqartarlutik. Aamma A/S INI-imut akiliut qaffattarpoq, angallannermut akit qaffaarput allallu sorpassuit akii qaffanneqartarlutik taamaalilluni tamanna inuppassuarnik eqquisarluni. Tamanna pisarpoq uulia Polar Oilimit appartinneqanngippat. Taamaattumik orsussap qaffanneqarnissaa piterusunnanngeqaaq, SIK-p siulittaasua oqarpoq.
Aamma atuaruk Aningaasaqarnermut siunnersuisooqatigiit: Akitsuusersuinissaq aaqqissutaaginnarallarpoq
Akitsuutitigut 96,5 mio aaniarneqarput
Naalakkersuisut nioqqutissat ilaannik ikummatissanullu akitsuutinik qaffaanissamik siunnersuuteqarneranni, tamanna Nunatta karsianut 96,5 millioner koruuninik isertitaqaataasussatut naatsorsuutigineqarpoq.
Nunatta karsiata ukiuni tulliuttuni pingasuni amigartooruteqarluni ingerlanneqarnissaa, SIK-p siulittaasuanit ajorineqanngilaq, tassami naatsorsuutigineqarmat 2019-miit Nunatta karsia sinneqartorruteqarluni ingerlanneqalersussaammat.
