SIK aamma Sulisitsisut Peqatigiiffiat kiisami isumaqatigiipput

Suliffeqarfiillu namminersortuusut sulisui 4.000-iusut atugaat pillugit sisamanik assigiinngitsunik isumaqatigiissuteqarfigaat.

Jess G. Berthelsen ima oqarpoq.

- Isumaqatigiissuteqarnerput ataatsimut isigalugu pitsaasutut isigaara ingerlariaqqinnissamullu tunngaviliisuusoraara, Jess G. Berthelsen oqarpoq.

Nangilluni nassuiaavoq 11-12 procentip missaani angusaqarsimallutik.

- Isumaqatigiinniartarnitsinnut allanut saniliullugu una isumaqatigiinniarneq ajornerunngivippoq aningaasaateqarfimmut tunngasumik isumaqatigiinniarnerput eqqaassanngikkutsigu, Jess oqarpoq.

Aningaasaateqarfiilli siunissami isumaqatigiinniaqqilerunik uterfigeqqissagitsik unnerpaa.

Jess G. Berthelsen aperaarput, sivisuumik isumaqatigiittoqarsimannginnera peqqutaalluni sulisut utaqqisariaqarsimammata apriilip aallaqqaataaniit ataasiartumik aningaasanngorlugu tunniunneqartussanik iluarsiissuteqarnissamik illuatungeriit isumaqatigiissuteqarfigisimammassuk, taava sulisut pineqartut qassinik tunineqassanersut.

- Isumaqatigiinniarneq taamaattarpoq ajoraluartumimmi tamatigut isumaqatigiittuaannartoqarsinnaaneq ajorpoq. Ukiuni marlunni tulliuttuni ataasiartumik taallugu 4.000 koruuninik tunineqassapput, Jess G. Berthelsen oqarpoq.

Erseqqissaatigaalu kingumut naatsorsuinissaq ajornartorsiutaasimasoq.

Jess G Berthelsen aperaarput, aaqqiagiinnginnerup ingerlanerani GA SIK-p aningaasaateqarfianut akiliisannginnerarlugu uparuartarsimagaa, taamaammallu isumaqatigiinneq qangali pisimasariaqaraluannginnersoq aperaarput.

- Soorunami taanna eqqartorneqarsinnaavoq, kisianni uagutsinnut pingaaruteqarsimaqaaq aningaasaateqarfiit ilaatigut aallaavigalugit isumaqatigiissuteqarnissaq, oqarpoq.

Nangillunilu oqaluttuarpoq Nunap eqqartuussisuaniit ajorsartinneqarsimallutik.

- Taassuma ajorsartitsinera uagut isumarput naapertorlugu tunngavissaqanngilaq, tassami inatsisit arbejdsmarkeds afgiftimut tunngasut piareeqqanngillat. Aammalu uani inatsisartut ataatsimiinnerini akuerineqaratik taamaattumik landsdommeri isumaqatiginngilluinnaqqissaarparput, Jess G. Berthelsen oqarpoq.

Erseqqissaatigaalu nunap eqqartuussisuaniit isumaqatigiinnissaminnik pinngitsaaliusanneqarsimanertik.

GA-p pisortaa Henrik Leth oqarpoq akissarsiat qaffannissaat, soraarnerussutisiallit akissaataasa qaffannissaat aammalu ilinniartunut atugassarititaasut pitsanngornissaat pillugit aningaasaliissuteqarumasimallutik.

Isumaqatigiinniarneq ippassaq unnuap qeqqata qeqqa naammassisoq pillugu oqarpoq isumaqatigiinniarneq imaannaanngissimasoq, naggataatigulli ajunngitsumik aaqqiissuteqarsimanertik iluarisimaarini.