SIK aamma RG isumaqatigiissuteqarput

Sulinermik Inuutissarsiuteqartut Kattuffiat, SIK aamma Royal Greenland A/S sulisut ilinniarsimasut ilinniagaqanngitsullu aningaasarsiaat sullivimminnilu atugassarititaasut pillugit ippassaq isumaqatigiissuteqarput.

Isumaqatigiissummi Royal Greenland A/S-imi ilinniartuutigineqartut aamma ilannguneqarput.

Isumaqatigiissut 2008-mi januaarip aallaqqaataaniit ukiuni pingasuni atuuttussatut isumaqatigiissutigineqarpoq.

Isumaqatigiinniartut sinniisaasa, Royal Greenlandimiit Pâviâraq Heilmannip SIK-miillu Jess G. Berthelsenip ataatsimoorussamik tusagassiuutinut nalunaarumminni isumaqatigiissutip imaa iluarisimaarnerarpaat.

Isumaqatigiissut ilaatigut aningaasarsianut, soraarnerussutisiassanut, ilaquttallu napparsimanerisa kingunerinik periusissanik imaqarpoq.