SIK Aamma GA isumaqatigiissuteqarput

Sulisitsisut suliffeqarfiutaanni sulisut pillugit SIK aamma GA isumaqatigiissuteqarput. Sulisut akissarsiaat 6,7 procentimik qaffanneqarnerisa saniatigut aamma isumaginninnermut aningaasaateqarfik pilersinneqassaaq, soorlu tamanna pisortat suliffeqarfiutaanni sulisunut aamma isumaqatigiissutaareersoq.
Allattoq Oline I. Olsen
apriilip 11-at 2013 18:09

-Tassa qujanartumik ukiuni pingasuni 6,7 procentinik agguaqatigiisillugu angusaqarpugut, isumaqarpugullu angusaq pitsaasoq, minnerunngitsumik Namminersorlutik Oqartussanut isumaqatigiissummut sanilliutissagaanni. Procentinngorlugu pitsaanerusumik oqaatigineqartariaqarpoq. Taamaattumik naammagisimaarparput. Sulinermik Inuussutissarsiuteqartut Kattuffianni siulittaasoq Jess G. Berthelsen oqarpoq. Naak naammagisimaarinnikkaluarluni, aningaasarsiat pisissutigineqarsinnaanerisa appariartornerinutnaapertuunnerusumik angusaqarusussimagaluarpoq.

- Tassami aningaasarsiat pisissutigineqarsinnaanerat ukiuni pingasuni kingullerni appariarsimavoq 8 procenti qaangerlugu.Pissanganarporlu ukiut pingasut ingerlanerani aningaasarsiat pisissutigineqarsinnaanerat qanoq  appariarsimatigissanersoq, aatsaallu ukiut pingasut qaangiuppata oqaatigisinnaanngussavarput, ullumikkut isumaqatigiissutigisarput pitsaasuusimanersoq imaluunniit ajorsimanersoq, Jess G. Berthelsen oqarpoq. Sulisitsisut suliffeqarfiutaani sulisunut akissarsiat utoqqalinersiallu isumaqatigiissutaanerisa saniatigut isumaginninnermut aningaasaateqarfik pilersinneqarpoq.

-Tassa taanna assorujussuaq nuannaarutigaarput socialfondemik  GAmut isumaqatigiissuteqarnerput. Soorlu isumaqatigiissutitigut napparsimaruluttoqartillugu matussuserneqarsinnaanngitsut socialfondeminngaanniit matussuserneqarnissaat, Jess G. Berthelsen oqarpoq erseqqissaallunilu Isumaginninnermut aningaasaateqarfik ilaasortaannarnit atorneqarsinnaajumaarmat

Sulisitsisut namminersortut suliffeqarfiutaani sulisunut isumaqatigiissut SIKimi siulersuisuunerit akueraat, isumaqatigiissullu immikkoortortaqarfinnut nassiunneqareerluni.