SIK 400.000-nik GA-mut akiliisussanngortinneqarpoq

Sulinermik Inuussutissarsiuteqartut Kattuffiat, SIK, Jess G. Berthelsenimit siulittaasuuffigineqartoq, Kalaallit Nunaanni Sulisitsisut Peqatigiiffiannut GA-mut 400.000 koruuninik akiliisussanngortinneqarpoq.

SIK pisuutinneqarpoq, GA avaqqullugu aningaasarsiat pillugit isumaqatigiinniarnissamik, suliffeqarfinnut GA-mut ilaasortaareersunut marlunnut saaffiginnissuteqarsimanini pillugu.

Isumaqatigiissitsiniarnikkut eqqartuussisup pissusilersorneq akuerineqarsinnaannginnerarlugu akiliisitsinissaq aalajangerpaa, aalajangernerlu GA-mi pisortamit Ole Rud-mit naammagisimaarneqarpoq.

-Aningaasat uani apeqqutaanngillat, tunngaviusumilli ataqqeqatigiilluni suleriaaseqarnissamut tunngassuteqarluni, pisortaq nassuiaavoq.

Aalajangiinerli SIK-p isumaqatiginngilaa.

- 400.000 koruuninik akiliinianngilagut. Aalajangiineq allamit aalajangiiffigisassanngorlugu ingerlateqqissavarput, SIK-p siulittaasua Jess G. Berthelsen oqarpoq.

Nunatta eqqartuussisuunerata Søren Søndergård Hansenip suliaa naammaginagu, SIK allamik aalajangiisussarsiorniarpoq.

Illuatungeriit arlaannaataluunnit suliffeqarfiit suut pineqarnersut oqaatigerusunngilaat. Erseqqissassavarpullu SIK GA-p avataatigut suliffeqarfinnut arlalinnut isumaqatigiissuteqartarmat.