Siiva Fleischer kulturikkut nersornaaserneqartoq
Nipilersortartoq misilittagartooq Siiva Fleischer ippassaq marlunngornermi Inuiattut ullorsiornitsinni Namminersorlutik Oqartussat kulturikkut nersornaasiuttagaannik tunineqarpoq. Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisup Nivi Olsenip nersornaat tunniuppaa.
Kitaarertartoq erinarsuusiortorlu Siiva Fleischer nipilersoqatigiinni Zikazakkunni 80-ikkunni pilersinneqartuni erinarsortartutut ilisarisimaneqarpaavoq, sulilu ullumikkut tusarnaartitsisarluni.
- Immikkuullarissumik erinaqarpoq nunatsinnilu erinarsortartut pikkorinnerpaat ilaattut isigineqarluni. Taalliai pingaarnertut ulluinnarni inuunermut tunngasuugajupput, tusarnaartullu nammineq takorluuisinnaassutsini atorlugu qanoq paasiumanerlugit isummersorfigisinnaavai. Taalliaasalu ilaat allat aamma inuttut assigiinngissutsitta aaqqiagiinngissutsittalu akuerinissaannut sammisuusarput, Siiva Fleischerip kulturikkut nersornaaseqarneranut atatillugu Nivi Olsen oqalugiaammini ilaatigut taama oqarpoq.
Namminersorlutik Oqartussat kulturikkut nersornaasiuttagaat 1982-imi pilersinneqarpoq 50.000 koruuninillu aningaasartaqarluni.
Nersornaasiineq Katuami pivoq, nutaatullu Naalakkersuisut inuusuttumut piginnaasalimmut kajumissaatitut nersornaasiuttagaat 10.000 koruuninik aningaasartaqartoq aamma tunniunneqarpoq.
Oqaluttualiaaqqanik "Zombiet Nunaannik" atuakkiortoq Sørine Steenholdt kajumissaatitut nersornaaserneqarpoq. Atuakkiortup saqqummersitaa siulleq Nunat avannarliit siunnersuisoqatigiivisa atuakkiamut nersornaasiuttagaanut innersuunneqarsimavoq.
- Atuakkiamigut inuiaqatigiinni pissutsit isorinnittumik eqqorluarlugillu allaaserisarpai, soorlu persuttaasarneq, imigassamik atornerluineq aamma meeqqanik isumassugassanik sumiginnaasarneq, taamalu uagutsinnut takutissimallugu inuiaqatigiinni artornartortaasut ingammik meeqqanut qanoq sunniuttarnersut, naalakkersuisoq Nivi Olsen Sørine Steenholdtimut oqalugiaammini taama oqarpoq.
