Sigguk A/S SIK-mit aningaasanik atukkerneqarpoq
Sigguk ApS Sulinermik Inuussutissarsiuteqartut Kattuffianit, SIK-p suliffissaqartitsiniarnermut aningaasaateqarfianit 250.000 koruuninik atukkerneqarpoq. SIK-p siulittaasua, Jess G. Berthelsen, tusagassiuutitigut taama allappoq.
Qaleralinnik Aasianni tunisassiulernissap kingunerisaanik suliffiit amerlasuut pilersinneqarnissaat, taamalu amerlanerusunik sulisoqalersinnaaneq, Aningaasaateqarfiup akuersinerminut tunngavigaa.
Jess G. Berthelsen aamma oqarpoq, qaleralittassat agguaanneqarnerinut nutaamik naliliisoqarnissaanut inatsisartunut ilaasortap, IA-meersup, Johan Lund Olsenip, piumasaqaataa akueriuminaatsoq -
qaleralinnut akuersissut tunniunneqartoq tunngavigalugu tunitsivissaq suliarineqarluni maanna aallartereersoq pissutigalugu.
SIK-p aamma apeqquserpaa, akuersissutinik tuniseriarluni arsaarinnittoqassappata, tamanna inatsisinik unioqqutitsinerunnginnersoq.
SIK isumaqarpoq, immikkut qaleralittassanut tunngatillugu nutsoruunnerit tamaanga killeqartariaqartut, suliffeqarfillu nutaaq, Sigguk ApS, aallartimmat nuannaarutigineqartariaqartoq, suliffissaqarniarnerup tungaatigut annertuumik sunniuteqarumaartoq SIK-p qularutiginngimmagu.