Siggartaatit vuvuzelat inerteqqutaalissapput
Siggartaatit Sydafrikami atorneqartartut, vuvuzelat, arsaalluni nunarsuaq tamakkerlugu pissartanngorniuttoqarnerani nunarsuaq tamakkerlugu tusaamaneqalersut, champions Leaguemi Europa Leaguemilu Europami arsaattoqarnerani isiginnaartunit atorneqaqqusaassanngillat.
Allattoq Rune Langhoff
septembarip 01-at 2010 15:55
Nutaarsiassaqartitsivik Ritzau taama ilisimatitsivoq.
Tamatumunnga pissutaavoq arsaattoqartillugu Europami qangali ileqqulersuutaasartut, soorlu erinarsorluni qiimmassaaneq ersaattaannerillu, attatiinnarneqarnissaat, Europami Arsaattartut Kattuffissuata, UEFA-p. kissaatigimmagu.
- Arsaattoqartillugu arsaattartut isiginnaartullu akornanni inuit pissusilersuutaat pingaaruteqartartorujussuuvoq, isiginnaartummi arsaattunut qamannga pisumik nuannaarlutik allatulluunniit suaartarsinnaapput, UEFA-mit nassuiaapput.
- Isiginnaartut akornanni nuannaarluni misigissutsinik takutitsisinnaaneq siggartaatit vuvuzelat allanngorterujussuarsinnaavaat, qoqernaqigamimmi, kattuffiimmit allapput.
