Siberiami qaarusuk qaartoorpoq
Sibiriap kujasissuani qaarusummi sulisut annaassiniartarlullu 83-it qaartoornerup kingorna mattussaaqqapput. Maannamut inuit toqugasut aqqaneq marluk nassaarineqarsimapput aqqunarsimasut 55-it nassaarineqarsimallutik.
Allattoq Apollo Jeremiassen
maajip 09-at 2010 13:25
Qaarusuk aamarsuarnik piiaaffik Kemerovop ilaaniittoq marloriarluni qaartoorpoq.
Qaartoornermi siullermi annaassiniartartut qaarusummut isertinneqarsimapput, tamatumalu kinguninngua qaartoortoqaqqippoq, qaarusummit anisarfik matuneqarluni, taamaalilluni aannaassiniartartut aamma mattussaallutik.
Tamatuma kingorna annaassiniarneq unitsinneqarpoq, ulorianarpallaalernera pissutigalugu. Sulisut ilaqutaat qaarusuup silataani tusarnissaminnut utaqqerrapput.
- Annaassiniartussanik allanik qaarusummut isertitsinissaq ulorianarpallaaqaaq, tassami inunnik allanik annaasaqarnissaq ilimanarnerummat Kemerovomi guvernøri russit nutaarsiassaqartitsivianut Itar-Tassimut oqarpoq.
Silaannalersuummik pumpemik qaarusuup iluanut maanna silaannalersuisoqarpoq.
